1 Krónikanan 18 - Papiamentu Bible 2013(PB13)

David su kampañanan militar(2 Samuel 8:1-14)

1Despues David a derotá e filisteonan i a someté nan. El a kita siudat Gad ku e pueblonan ku tabata pertenesé n'e for di nan.

2Tambe el a derotá e moabitanan. P'esei e moabitanan mester a pag'é belasting.

3Tambe David a derotá Hadadezèr, rei di Soba, banda di Hamat, ora esaki a bai purba establesé su dominio den region di riu Efrata.

4David a kohe 1000 garoshi, 7000 sòldá di kabayeria mas 20.000 sòldá di infanteria di Hadadezèr prezu; ademas el a laga kòrta kabuya di pata di tur e kabainan di garoshi di guera, ku eksepshon di e kabainan nesesario pa shen garoshi.

5E arameonan di Damasko a bin yuda Hadadezèr, rei di Soba, pero David a derotá e sòldánan arameo i mata 22.000.

6Tambe el a lanta pòstnan militar den e reino arameo di Damasko. For di e dia ei e arameonan tabata someté na David i nan mester a pag'é belasting. Asina SEÑOR a duna David viktoria unda ku el a bai bringa.

7David a kohe e eskudonan di oro ku e guardianan personal di Hadadezèr tabata usa i a bai Herusalèm ku nan.

8I na Tibhat i Kun, siudatnan ku tabata pertenesé na Hadadezèr, rei David a kohe un gran kantidat di bròns. Despues Salomon a laga traha e asina yamá Laman di bròns kuné, e dos pilánan i e otro ophetonan pa sirbishi den tèmpel.

9Ora Toú, rei di Hamat, a tende ku David a derotá henter e ehérsito di Hadadezèr, rei di Soba,

10el a manda su yu hòmber Hadoram ku ophetonan di oro, plata i bròns serka dje pa kumind'é i yam'é pabien, pasobra el a bringa ku Hadadezèr i derot'é.

11Hadadezèr semper tabata na guera ku Toú. David a konsagrá tur e ophetonan akí tambe na SEÑOR, meskos ku el a hasi ku e oro i plata ku el a kohe for di tur e nashonnan, esta for di Edom, di Moab i di Amon, di e filisteonan i e amalekitanan.

12Abshai, yu hòmber di Seruya, a derotá e edomitanan den Vaye di SaluSalmo 60 Título hebreo kaminda 18.000 di nan a muri.

13Despues el a lanta pòstnan militar den Edom; i tur e edomitanan a keda someté na David. Unda ku David a bai bringa SEÑOR a dun'é viktoria.

E funshonarionan di David(2 Samuel 8:15-18; 20:23-26)

14Unabes David a bira rei di henter Israel, el a duna pueblo su derechi i hasi hustisia.

15Hefe di ehérsito tabata Yoab, yu hòmber di Seruya;

Yoshafat, yu hòmber di Ahilud, tabata sekretario di estado.

16Sadok, yu hòmber di Ahitub, i Abimelèk, yu di Abyatar, tabata saserdote.

Shausha tabata sekretario,

17i Benayahu, yu hòmber di Yoyada, tabata na kabes di e guardia keretita i peletita.

E yu hòmbernan di David tabatin puestonan importante na korte.