1Mi ta sklama na Dios, mi ta grita,
mi ta sklama na Dios p'E tende mi.
2Den mi ansha mi ta buska SEÑOR,
ku mi man henter anochi na laria,
sin kansa di pidi yudansa.
Mi alma ta nenga konsuelo.
3Si mi kòrda riba Dios òf meditá,
mi kurason ta kibra i mi ta keha.
4Bo n' ta laga mi wowo sera,
mi t'asina turdí ku mi n' por papia.
5Mi ta pensa riba e dianan di ántes,
riba añanan ku a pasa mashá ten.
6Anochi mi ta keda rekordá
kon mi ta'ta kanta di SEÑOR;
mi ta meditá profundamente,
mi spiritu ta blo hasi pregunta:
7Señor lo rechasá nos pa semper?
L'E no mustra su kariño nunka mas?
8Akaso su bondat a bai pa keda?
Su promesa no ta sali nunka mas?
9SEÑOR a lubidá su kompashon?
E ta asina rabiá ku E n' tin duele?
10Loke ta duel mi mas tantu t'e idea
ku aktuashon di Altísimo a kambia!
11Mi ta rekordá Dios su hazañanan,
sí, mi ta kòrda bo milagernan di ántes.
12Mi ta pensa riba tur loke B'a hasi
i mi ta meditá riba bo obranan.
13Tur loke Bo ta hasi, Dios, ta santu.
Kua Dios ta mes grandi ku nos Dios?
14Abo, e Dios ku ta hasi milager,
ku ta mustra nashonnan bo poder;
15ku a libra bo pueblo ku man fuerte,
e yunan di Yakob i Jozef.
16O Dios, awa di laman a mira Bo,
laman a mira Bo i a krem,
el a sakudí te den su fondo.
17Nubianan a basha nan awa,
bos a ronka den shelu,
bo flechanan a kòrta bai bini.
18Zonido di bos a sigui lora,
mundu tur na lus di welek,
tera a tembla, sakudí.
19Bo kaminda a pasa den laman,
Bo a kana den masa di awa:
no por a mira bo pasonan!
20Bo a guia bo pueblo, bo karnénan,
pa man di Moises i Aaron.
Who We AreWhat We EelieveWhat We Do
2025 by iamachristian.org,Inc All rights reserved.
