1Skucha, Wardador di Israel,
ku ta guia Jozef, bo rebaño;
for di bo trono ku ta riba kerubinnan
manifestá Bo ku splendor dilant'i bista
2di Efraim, Benhamin i Manase.
Mustra bo poder, bin salba nos!
3O Dios,
trese un kambio pa nos!
Mira nos ku bista di kariño
i nos lo ta salbá!
4SEÑOR, o Dios di universo,
te ki dia Bo ta keda sulfurá,
ora bo pueblo ta resa na Bo?
5B'a dun'é pan di lágrima pa kome,
pa bibida un riu di aw'i wowo.
6Nos t'un motibu di pleitu pa bisiñanan,
nos enemigunan ta chèrchè nos.
7Dios di universo,
trese un kambio pa nos!
Mira nos ku bista di kariño,
i nos lo ta salbá!
8B'a saka un mata di wendrùif fo'i Egipto,
B'a plama pueblonan fo'i otro pa plant'é.
9B'a traha tera p'e, pa asina tur kaminda
e tira rais i yena e pais.
10Ku su sombra el a tapa serunan,
ku su rankanan seder grandioso.
11Te na laman el a saka su ramanan,
te na Eufrat su spreitnan.
12Di kon B'a tumba su kurá di piedra,
pa ken ku pasa por a kohe su frutanan?
13Pa porkonan di mondi dispidié
i bestianan feros kom'é hasié limpi limpi?
14Dios di universo, bolbe!
Mira abou for di shelu, ripará!
Bin atendé ku bo mata di wendrùif
15ku bo man drechi a planta komo planchi:
bo mes yu ku B'a duna fortalesa.
16Laga nan ku ke kim'é komo sushi
peresé pa bo mirada furioso.
17Laga bo man sosegá
riba e hende sintá na bo lado,
e yu di hende ku B'a duna fortalesa:
18anto nos lo n' bandoná Bo nunka mas.
Duna nos bida i nos lo invoká Bo!
19SEÑOR, Dios di universo,
trese un kambio pa nos!
Mira nos ku bista di kariño
i nos lo ta salbá!
Who We AreWhat We EelieveWhat We Do
2025 by iamachristian.org,Inc All rights reserved.
