2 Krónikanan 6 - Papiamentu Bible 2013(PB13)

Salomon ta bendishoná e tèmpel(1 Reinan 8:12-66)

1E ora ei Salomon a resa: ‘SEÑOR, Bo a bisa ku Bo ke biba den un nubia skur.

2Awèl mi a traha un kas mahestuoso pa Bo, un lugá fiho kaminda Bo por keda biba pa semper.’

3Despues rei a bira ku kara pa henter komunidat di Israel. Ora tur hende a lanta para, el a bendishoná nan

4i bisa: ‘Bendishoná sea SEÑOR, Dios di Israel, ku a kumpli eksaktamente ku loke El a primintí mi tata David, ora El a bis'é:

5“For di dia ku Mi a saka mi pueblo for di Egipto, Mi no a skohe ningun siudat den e tribunan di Israel pa traha un tèmpel aya i liga mi nòmber kuné. Mi no a skohe niun hòmber tampoko komo prínsipe di mi pueblo Israel.

6Pero Mi a skohe Herusalèm pa ei hende por bini serka Mi. Mi a skohe abo, David, pa goberná mi pueblo Israel.”

7Mi tata David tabatin deseo di traha un tèmpel na honor di SEÑOR, Dios di Israel.

8Sinembargo SEÑOR a bis'é: “Ta bon ku bo ke traha un tèmpel na mi honor,

9pero no ta abo lo trah'é, sino e yu hòmber ku lo bo tin. T'e lo traha e tèmpel na mi honor.”