1Dios ta baha pisá riba Tiro.
Barkunan grandi di karga,
yora malai,
pasobra Tiro ta destruí,
niun kas no a keda riba pia!
Bolbiendo for di Chipre,
ya boso a tende e notisia.
2Lamentá, habitantenan di kosta,
boso, komersiantenan di Sidon,
ku ta manda mensaheronan krusa laman.
3Trigo di delta di Nilo
a krusa laman ganchu yega Tiro,
loke a sembra i kosechá kantu di Nilo,
ta forma e fuente di entrada pa Tiro.
E ta biba di komèrsio ku pueblonan.
4Bèrgwensa p'abo, Sidon,
i p'abo tambe, Tiro, fòrti kant'i awa;
pasobra laman bashí ta keha:
‘Ta manera nunka mi n' haña doló di parto,
mi n' pari yu,
kria yu hòmber
ni lanta yu muhé.’
5Egipsionan tambe ta tembla,
ora nan haña notisia
ku Tiro ta destruí.
6Basha gritu di yoramentu
habitantenan di kosta,
krusa oséano, hui te Tarsis na Spaña!
7T'esaki boso siudat a para bira,
o siudat tan ekstrabagante,
fundá den tempunan hopi bieu
i ku semper a buska manera
pa establesé su mes den paisnan leu?
8Ántes Tiro tabata parti korona real,
su negosiantenan tabata rei,
su komersiantenan shon grandi di mundu.
Ta ken anto a disidí su pèrdishon?
9Ta SEÑOR soberano!
T'E a disidí di kibra bo orguyo,
kita tur bo gloria,
pone grandinan di mundu bira chikí.
10Habitantenan di Tarsis,
plama numa den boso mes tera
manera awa di Nilo ta hasi,
pasobra e barera ku Tiro a lanta, a disparsé.
11SEÑOR a rèk su man riba laman,
El a pone reinonan tembla;
El a duna òrdu
pa destruí fòrtinan di Fenisia.
12Lo yega un fin na boso fiestanan,
habitantenan di Sidon.
Boso siudat t'un bírgen violá.
Boso por hui bai Chipre,
pero aya tampoko boso bida no ta sigur.
13Kòrda Babilonia!
E pueblo ku tabata biba ei
no ta eksistí mas.
Asirionan a konstruí aparatonan di atake,
basha palasionan abou i destiná e pais
pa bestia di desierto bib'aden.
14Barkunan di karga, yora malai,
pasobra boso siudat fortifiká ta destruí!
15E dia lo yega ku Tiro lo pasa pa olvido, setenta aña largu, mes tantu ku bida di un rei ta dura. Ora e setenta añanan akí pasa, Tiro lo tin e mes destino ku e prostituta den e kantika konosí:
16‘Kana pasa den siudat ku bo lira,
mariposa lubidá!
Toka i kanta bunita numa
mas duru i tantu ku bo por,
podisé bo klientenan lo bini bèk.’
17Despues di setenta aña SEÑOR lo bolbe okup'É ku Tiro. Tiro lo por bolbe ehersé su profeshon di ántes i bende su mes ku tur reino di mundu.
18Pero tur ganashi di e trabou akí lo ta apartá pa SEÑOR. Lo no ward'é den kaha di plaka, pero lo e ta na benefisio di esnan ku ta biba serka SEÑOR. Nan lo por kumpra kuminda na abundansia i paña bunita kuné.
Who We AreWhat We EelieveWhat We Do
2025 by iamachristian.org,Inc All rights reserved.
