Isaías 62 - Papiamentu Bible 2013(PB13)

Herusalèm, siudat kerí di Dios

1Ora mi mira bo, Herusalèm,

mi no por keda ketu,

amor pa bo, Sion, no ta laga mi sosegá

te ora ourora di libertat kibra

i antorcha di salbashon sende.

2Tur pueblo lo mira kon Dios ta liberá bo,

nan reinan lo kontemplá bo gloria i splendor.

Bo ta haña un nòmber nobo,

un nòmber ku Dios mes a skohe.

3Den man di SEÑOR, bo Dios,

lo bo ta un korona presioso,

un diadema real.

4Lo no yama bo mas Siudat Bandoná,

bo pais lo no karga nòmber mas di Tera Desolá.

Nò, nan lo yama bo Dios su Pret'i Wowo,

i bo pais Esposa.

Pasobra bo ta pret'i wowo di SEÑOR

i bo ta bolbe haña esposo.

5Pasobra mes ansioso ku un mucha hòmber ta pa kasa,

mes ansioso bo yunan lo ta pa tuma poseshon di bo;

mes kontentu ku un brùidehòm ta ku su brùit,

mes kontentu bo Dios lo ta ku bo.

6M'a pone guardia riba bo murayanan, Herusalèm!

Nan no mag sera nan boka niun momento,

ni di dia ni anochi.

Boso, guardianan, tin e enkargo

di rekordá SEÑOR riba Herusalèm,

boso no mag duna boso kurpa sosiegu,

7ni duna Dios tampoko ora i porta,

te dia E restourá Herusalèm

i hasié dje bunita ei

ku henter mundu ta gaba su beyesa.

8SEÑOR a hura:

‘Mi ta hura mi pueblo

pa tur e poder ku Mi tin:

Nunka mas boso enemigunan lo no kome boso trigo,

strañeronan lo no bebe boso biña,

pasobra ta boso mes a púluwe pa nan.

9Nò, hende ku rekohé trigo ta kome di dje

i duna Mi honor.

Hende ku kosechá wendrùif ta bebe biña

i honra Mi riba plenchi di tèmpel.’

10Hendenan di Herusalèm,

sali di e portanan, hasi lihé!

Habri kaminda p'e pueblo ku ta bini.

Yena burakunan den kaminda,

kita piedranan for di riba dje.

Lanta un señal pa pueblonan mira.

11Henter mundu a tende stèm di SEÑOR grita:

‘Bisa habitantenan di Herusalèm:

“Wak, ata boso Salbador ta bini!

E ta bini ku su rekompensa,

su botin ta kompañ'É.” ’

12Boso nashon lo ta yamá:

‘Pueblo santu di Dios’,

e pueblo ku El a sali p'e.

I abo, Herusalèm,

lo karga nòmber di Pret'i Wowo di Dios,

Siudat nunka mas bandoná!