Job 5 - Papiamentu Bible 2013(PB13)

Elifaz ta bisa ku ta Job mes tin falta

1Sigui pidi yudansa numa,

niun hende no ta rospondé bo.

Ken bo tin serka di Dios

ku por intervení pa bo?

2Kere mi, solamente hende bobo

ku nan morto ta yag nan, ta kunsumí asina;

ta hende sin sintí ta laga rabia kaba ku nan.

3Mi eksperensia ta:

un hende nesio ta manera un palu

ku fásilmente ta tira rais,

ma mes lihé tur kos ta kaba p'e.

4Su yunan no ta seif niun kaminda.

Otro hende ta probechá di nan den korte,

nan no ta skapa.

5Hende ku hamber ta kome e nesio su kosecha,

maske ta fo'i bou di sumpiña nan tin ku sak'é;

hende morto di set ta anhelá su rikesanan.

6Pasobra mizeria no ta krese di mes,

problema no ta spreit fo'i tera;

7nò! Ta hende ta kousa nan,

mes sigur ku chispa ta sali fo'i kandela.Elifaz ta konsehá Job pa hiba su kaso dilanti di Dios

8Si tabata ámi lo m'a konsultá Dios

i present'É mi kaso,

9pasobra Dios ta hasi kosnan asina grandi,

ku mente di hende no por skrudiñá,

asina tantu milager, ku no por kaba di konta nan.

10E ta manda yobida riba mundu,

laga awa kai riba kunukunan;

11E ta alsa hende humilde;

esnan trapá lo kana kara na laria.

12E ta desbaratá plannan di hende astuto,

di manera ku nan no por realisá nan mas.

13E ta kohe e astuto den su mes trampa

i kaba ku e chake di e gañadó

den un fregá di wowo.

14Di dia kla nan tur lo topa ku skuridat,

den pleno lus di dia nan lo tira man, fula,

manera hende siegu den skuridat.

15Pero hende indefenso E ta salba

fo'i boka ku djente skèrpi manera spada,

fo'i gara di poderosonan.

16Di manera ku hende débil por karga speransa

i inhustisia su boka ta keda será.

Elifaz ta sigurá Job ku SEÑOR lo lant'é atrobe

17P'esei felis e hende ku SEÑOR skual;

e no mester tuma na malu

ora SEÑOR todopoderoso koregié.

18Pasobra SEÑOR ta habri herida

pero E mes ta mara nan;

E ta heridá, pero su man mes ta kura.

19Si bo haña bo den seis problema, shete pèrtá,

sin sa ki banda bo kohe,

E ta libra bo kada be di nobo

i nada malu n' ta pasa bo.

20Den tempu di hamber

E ta ranka bo for di morto;

den tempu di guera

E ta libra bo di poder di spada.

21E ta spar bo di mala lenga

i lo bo no tin miedu di kos malu ku presentá.

22Ni hamber ni destrukshon lo no ta preokupashon pa bo,

bestia feros lo no spanta bo.

23Lo no tin piedra den kunuku pa stroba bo trabou

i bestia di mondi lo laga bo na pas.

24Bo por konta ku den bo kas tin seguridat,

ora bo bai wak bo karnénan,

tur lo t'ei.

25Bo por konta ku lo bo tin hopi desendiente,

nan lo ta manera yerba ku ta krese tur kaminda.

26Bo ora di muri ta yega

ora bo alkansá e edat apropiá;

manera e momento pa dakuná maishi ta yega

ora ta tempu pa kosech'é.

27Job, nos eksperensia di bida a siña nos esei,

pens'é i tum'é na serio.’