Job 26 - Papiamentu Bible 2013(PB13)

Job ta interumpí diskurso di Bildad i ta hasié ridíkulo

1E ora ei Job a rospondé:

2‘Esta un bon manera di yuda hende,

un hende pober i débil manera mi!

3Esta bon bo ta duna hende sin sabiduria konseho!

Bo gran sabiduria frankamente a laga mi babuká!

4Ken a yuda bo ku e palabranan bunita ei?

Ken a inspirá bo pa bo papia asina?’

Bildad ta sigui ku su diskursoGrandesa di Dios

5Bildad a kontinuá:

‘Spiritu di hende morto ta tembla pa Dios

manera bara bèrdè,

habitantenan di lamannan bou di tera tambe.

6Reino di morto ta hanchu habrí p'E,

eiden nada no ta keda skondí p'E.

7Den e espasio bashí parti nort

Dios a span shelu

i El a pone mundu

kaminda no tabatin nada pa want'é.

8E ta retené awa den nubia

sin ku nan sker.

9E ta tapa su trono

ku kapa di nubia diki.

10E ta pinta e sírkulo di horizonte riba laman

i aki lus di dia ta kambia bira anochi.

11Ora Dios menasá,

serunan ta tembla di miedu,

serunan manera pilá

ku ta karga shelu.

12El a dominá laman ku su forsa;

El a derotá e mònster Rahab ku su sabiduria.

13Ku su rosea El a supla riba firmamentu,

lag'é limpi limpi

i El a bora e mònster yangadó di laman mata.

14Tur loke m'a trese dilanti ta djis un punta

di loke Dios a hasi;

tur loke nos a tende ta djis un vrunvrun!

Imaginá bo kon zonido poderoso di su poder

por aplastá nos.’