Éksodo 14 - Papiamentu Bible 2013(PB13)

E israelitanan ta krusa Laman Kòrá

1SEÑOR a bisa Moises:

2‘Bisa e israelitanan bai bèk i lanta nan kampamentu dilanti di Pi-Hahirot entre Migdol i laman, nèt dilanti di Baal-Sefon, kantu di laman.

3E ora ei fárao lo pensa ku e israelitanan a pèrdè kaminda i desierto a sera nan aden.

4Mi ta sòru pa fárao ta tèrko, di manera ku e ta persiguí boso. Ora Mi derot'é ku henter su ehérsito poderoso, lo Mi engrandesé mi gloria. E egipsionan lo sa ku Ami ta SEÑOR.’ E israelitanan a hasi loke Moises a bisa.

5Ora rei di Egipto a tende ku e israelitanan a hui, a duel e i su funshonarionan ku nan a laga e israelitanan bai. Nan a grita: ‘Kiko nos a hasi, awor nos a pèrdè nos katibunan!’

6Fárao a laga prepará su garoshi di guera i a yama su ehérsito huntu.

7El a bai ku tur e garoshinan di Egipto, den nan tabatin e seisshennan di mas mihó. Kada garoshi tabatin un ofisial aden.

8SEÑOR a hasi fárao tèrko, di manera ku el a persiguí e israelitanan ku tabata sali disididu for di Egipto.

9Henter e ehérsito di Egipto, kabai, garoshi ku sòldá aden a persiguí e israelitanan. Nan a alkansá e israelitanan kantu di laman, na Pi-Hahirot, dilanti di Baal-Sefon, kaminda e israelitanan tabatin nan kampamentu.

10Ora e israelitanan a ripará ku fárao i e egipsionan tabata yega serka nan, nan a spanta mashá i a sklama na SEÑOR pa E yuda nan.

11Nan a bisa Moises: ‘Akaso no tabatin graf na Egipto? Nos mester a bai ku bo pa nos muri den desierto? Pakiko bo a hasi asina ku nos? Pakiko bo a saka nos for di Egipto?

12Nos no a bisa bo na Egipto pa bo laga nos keda traha pa e egipsionan i ku ta mihó nos keda nan katibu ku nos muri den desierto!’

13Pero Moises a kontestá nan: ‘No tene miedu! Wanta duru! Paga tinu na loke SEÑOR ta bai hasi awor pa salba boso, pasobra boso no ta weta e egipsionan ku boso weta awe nunka mas.

14SEÑOR ta bringa pa boso, boso no tin mester di hasi nada.’

15Despues SEÑOR a bisa Moises: ‘Pakiko bo ta sklama pa yudansa. Duna e israelitanan òrdu pa nan baha nan tèntnan i sigui nan kaminda.

16I abo, kohe bo bastòn; rèk bo man riba laman i e ora ei e laman lo parti for di otro i e israelitanan por pasa dor di dje riba tera seku.

17Ami mes ta hasi e egipsionan tèrko di manera ku nan ta sigui persiguí Israel. Lo Mi engrandesé mi gloria ora Mi derotá fárao i su ehérsito, su garoshinan i sòldánan aden.

18E ora ei e egipsionan lo haña sa ku t'Ami ta SEÑOR.’

19E ora ei e Angel di SEÑOR i e pilá di nubia ku tabata bai dilanti di e israelitanan a kambia di lugá i a bai para nan tras,

20di manera ku e pilá di nubia a keda pará entre e ehérsito di e egipsionan i esun di e israelitanan. Pa e egipsionan e nubia tabata skur, pero pa e israelitanan e tabata lus. Esaki tabata e motibu ku nan no a topa otro henter anochi.

21Moises a rèk su man riba laman i henter anochi SEÑOR a laga un bientu duru di ost suplaSalmo 77:16-20 ku a parti e laman na dos i seka e tera.

22E israelitanan a pasa riba tera seku.Sabiduria 10:18-19; 1 Korintionan 10:1-2; Hebreonan 11:29 Na nan man drechi i man robes e awa a keda manera un muraya.

23E egipsionan a persiguí nan. Tur kabai di fárao i garoshi ku e sòldánan aden a drenta meimei di laman tras di e israelitanan.

24Mardugá SEÑOR a mira for di e pilá di kandela i nubia riba e ehérsito di e egipsionan. El a sembra pániko

25ora El a laga nan wil di garoshi pega ku ta ku mashá molèster nan por a bai dilanti. E egipsionan a bisa: ‘Laga nos hui di e israelitanan, pasobra SEÑOR ta bringa na nan fabor i kontra nos!’

26E ora ei SEÑOR a bisa Moises: ‘Rèk bo man riba laman pa e awa bini bèk tapa e egipsionan, nan garoshinan ku e sòldánan aden.’

27Moises a rèk su man riba laman i ora di dia tabata bai habri e awa a bolbe na su lugá. E egipsionan a hui kontra koriente di e awa. Asina SEÑOR a hundi nan den laman.

28E awa ku tabata bai su lugá bèk a tapa e garoshinan ku e sòldánan aden, henter ehérsito di fárao ku tabata persiguí e israelitanan. Ningun hende no a skapa.

29Pero e israelitanan a krusa meimei di laman riba tera seku, miéntras e awa tabata pará manera un muraya na nan man drechi i nan man robes.

30Riba e dia ei SEÑOR a salba e israelitanan di poder di e egipsionan. I e israelitanan a weta kadaver di e egipsionan kantu di laman.

31Ora Israel a weta kon SEÑOR a mustra su gran poder kontra e egipsionan, nan tabata yen di rèspèt p'E i yen di konfiansa den djE i den su sirbidó Moises.