Job 23 - Papiamentu Bible 2013(PB13)

Job ta kontestáDios lo skucha Job si Job logra hañ'É

1E ora ei Job a tuma palabra i bisa:

2‘Awor sí mi kana a yena

i ta ku hopi esfuerso mi ta dominá mi.

3Ai, mare mi por a haña Dios

i yega te den su kas.

4Lo mi a splik'É mi kaso

i eksponé tur mi argumentonan n'E.

5E ora ei lo m'a tende loke E tin di bisa

i lo m'a sa kiko E ta pensa.

6Durante e diskushon lo E no usa forsa mayor.

Nò, pasobra E no por akusá mi di nada tòg.

7Aya den su kas,

un hende ku a biba segun Dios su boluntat

lo por present'É su kaso.

Di mes antó ami lo keda liberá di mi hues pa semper.

Job a buska Dios tur kaminda

8Mi a buska parti ost,

pero Dios no tabat'ei;

ora m'a buska parti wèst,

mi no a hañ'É.

9Ora E ta traha den parti nort,

mi no ta mir'É;

ora E bira pa zùit

mi no ta mira ni su sombra.

10E sí konosé mi manera di biba.

Ora E pone mi na prueba,

lo resultá ku mi ta puru manera oro.

11Semper mi a hasi loke Dios a manda,

mi a sigui su boluntat, no mi propio deseonan.

12Mi no a desviá di su mandamentunan,

mi a apresiá kada palabra ku a sali for di su boka

mas ku mi pan di kada dia.

Job ta kere ku Dios tin un plan kuné

13Dios ta úniko i niun hende no ta kambia su manera di pensa.

E ta hasi loke E ke.

14E ta kumpli ku loke El a disponé pa mi,

i ainda E no ta kla ku mi.

15P'esei mi tin miedu di enfrent'É;

e idea so ya kaba ta laga mi kurpa kohe rel.

16Dios Todopoderoso a kaba ku mi kurashi.

17Ta Dios i no e skuridat ku ta rondoná mi,

ta yena mi ku miedu.