1 Samuel 7 - Papiamentu Bible 2013(PB13)

1E ora ei e habitantenan di Kiriat-Yearim a bai kohe e arka di SEÑOR bini kuné i nan a pon'é den e kas di Abinadab ku tabata keda riba un seru; despues nan a konsagrá su yu Eleazar pa é kuida2 Samuel 6:2-4; 1 Krónikanan 13:5-7 e arka di SEÑOR.

Samuel ta guia Israel komo hues

2A pasa basta tempu, un binti aña asina, for di dia ku nan a pone e arka na Kiriat-Yearim. Ora henter Israel a kuminsá sklama na SEÑOR,

3Samuel a bisa tur e israelitanan: ‘Pa boso bolbe ku henter boso kurason na SEÑOR, boso mester tira tur e diosnan di e strañeronan i e imágennan di Astarte afó, dediká boso bida na SEÑOR i sirbi É so. E ora ei lo E libra boso di gara di e filisteonan.’

4E israelitanan a tira e imágennan di Baal i Astarte afó i nan a sirbi SEÑOR so.

5Despues Samuel a duna òrdu: ‘Laga henter Israel reuní na Mispa, ami lo resa pa boso na SEÑOR.’

6E israelitanan a bini huntu na Mispa. Nan a saka awa i bash'é komo ofrenda na SEÑOR. E dia ei nan a yuna i nan a rekonosé públikamente ku nan a peka kontra SEÑOR. Ei na Mispa Samuel a fungi komo hues di e israelitanan.

7Ora e filisteonan a haña sa ku e israelitanan tabata reuní na Mispa, e hefenan di stat filisteo a sali pa bai ataká nan. E israelitanan a haña sa. Nan a haña miedu di e filisteonan

8i nan a bisa Samuel: ‘No keda sin sklama na SEÑOR nos Dios pa nos, pa E salba nos for di gara di e filisteonan.’

9Samuel a kohe un lamchi na lechi i a kim'é hinté komo sakrifisio na SEÑOR, despues el a resa na SEÑOR pa e israelitanan i SEÑOR a dun'é kontesta.

10Miéntras Samuel tabata ofresé e sakrifisio, e filisteonan a bai mas dilanti pa ataká e israelitanan; e dia ei SEÑOR a laga bos zona duru riba nan kabes pone nan drenta den asina un pániko ku e israelitanan a vense nan.

11Mesora e israelitanan a sali for di Mispa pa persiguí e filisteonan i nan a kaba ku nan te zùit di Bet-Kar.Sirag 46:16-18

12Despues Samuel a kohe un piedra i a pon'é meimei di Mispa i Sen; el a yam'é Ebèn-Haezèr, es desir piedra di yudansa. ‘Pasobra,’ el a bisa, ‘te awor akí SEÑOR a yuda nos.’

13Nan a derotá e filisteonan i esakinan no a bin invadí e teritorio israelita mas; tanten Samuel tabata na bida, man di SEÑOR tabata pisá riba e filisteonan.

14E siudatnan ku e filisteonan a kita for di e israelitanan, di Ekron te Gat, a bolbe bira di Israel. Asta e teritorio ku tabata pertenesé na e siudatnan di e filisteonan e israelitanan a kita. Tabata reina pas entre e israelitanan i e amoritanan.

15Samuel a sigui guia e israelitanan komo hues henter su bida largu.

16Tur aña e tabata pasa Betel, Guilgal i Mispa, na tur e lugánan akí e tabata aktua komo hues di Israel.

17Kaba e tabata regresá Rama, kaminda e tabata biba; for di ei e tabata guia Israel komo hues. Tambe el a lanta un altá pa SEÑOR einan.