2 Krónikanan 12 - Papiamentu Bible 2013(PB13)

Rei Shishak ta invadí Huda(1 Reinan 14:21-31)

1Asina Rehabeam a pone su reino para firme i haña outoridat, e i henter su pueblo no ker a tende nada mas di lei di SEÑOR.

2Shishak, rei di Egipto, a sali bai ataká Herusalèm den e di sinku aña ku Rehabeam tabata rei, pasobra nan no a keda fiel na SEÑOR.

3Shishak a bini ku 1200 garoshi i 60.000 sòldá di kabayeria, miéntras no por a konta e hendenan di Libia, di Etiopia i e sukitanan ku a bini kuné for di Egipto.

4El a konkistá e siudatnan reforsá di Huda i a penetrá te Herusalèm.

5E ora ei profeta Shemaías a bai serka Rehabeam i e lidernan di Huda, ku a reuní na Herusalèm pa motibu di invashon di Shishak i bisa nan: ‘Asina SEÑOR ta bisa: “Boso a bandoná Mi, awor Ami tambe a bandoná boso i entregá boso den man di Shishak.” ’

6Rei i e lidernan di Huda a rekonosé ku nan a hasi piká i a bisa: ‘Loke SEÑOR ta hasi ta hustu.’

7Ora SEÑOR a weta ku nan a rekonosé ku nan a hasi piká, El a bisa Shemaías: ‘Nan a rekonosé ku nan a hasi piká, p'esei lo Mi no destruí nan. Lo Mi laga nan skapa pronto for di man di Shishak i lo Mi no us'é pa Mi baha mi rabia riba Herusalèm.

8Tòg nan lo mester someté nan mes na Shishak, e ora ei nan lo eksperensiá e diferensia grandi entre sirbi Ami òf sirbi reinan di mundu.’

9Shishak, rei di Egipto, a sali pa ataká Herusalèm. El a bai ku tur tesoro for di tèmpel di SEÑOR i for di palasio di rei. Sí, el a bai ku tur tur kos. Asta e eskudonan di oro ku Salomon a laga traha el a bai kuné.1 Reinan 10:16-17; 2 Krónikanan 9:15-16

10E ora ei rei Rehabeam a traha eskudo di bròns na nan lugá i a pone nan bou di kuido di e komandantenan di warda na entrada di palasio.

11Kada be ku rei tabata bai tèmpel di SEÑOR, e guardianan tabata bin karga e eskudonan, despues nan tabata bolbe hinka nan den warda.

12Pasobra Rehabeam a rekonosé ku el a hasi piká, rabia di SEÑOR no a destruyé kompletamente. Ainda tabatin algu bon na Huda.

Fin di reinado di Rehabeam

13Rei Rehabeam tabata goberná ku firmesa. E tabatin 41 aña dia el a bini na poder; el a goberná 17 aña na Herusalèm, e siudat ku SEÑOR a skohe for di tur tribu di Israel, pa E biba aya. Su mama tabata di pais Amon i e tabata yama Naama.

14Rehabeam a hasi malu, pasobra e no a sigui SEÑOR di henter su kurason.

15Historia di Rehabeam for di antaño te mas resien ta skibí den Historia di profeta Shemaías i den esun di vidente Ido, ku ta trata registro di famia di Rehabeam. Durante henter su reinado tabatin guera entre e i Yerobeam.

16Dia Rehabeam a bai sosegá serka su antepasadonan, a der'é den Siudat di David. Abías, yu di Rehabeam, a siguié komo rei.