Job 8 - Papiamentu Bible 2013(PB13)

Promé diskurso di BildadBildad ta konsehá Job pa e roga Dios debolbé Job su rikesa

1Awor Bildad di Sua a tuma palabra:

2‘Bo ta blo papia numa.

Ki dia bo ta stòp di usa bo rosea

pa papia kos sin pia sin kabes?

3Dios Todopoderoso nunka no ta trose

ni hustisia ni derecho.

4Kasi sigur bo yunan a peka kontra Dios,

p'esei El a entregá nan na e kastigu,

ku nan pikánan mes a okashoná.

5Si bo buska Dios ku zelo

i pidi Dios Todopoderoso tene piedat di bo,

6si bo ta honesto i ta aktua ku rektitut,

E ta sali pa bo sigur

i restablesé bo hogar komo rekompensa.

7E rikesanan ku bo tabatin no ta nada

kompará ku loke bo ta bai risibí.

E patriarkanan tabata sa ku hende sin Dios ta sufri

8P'esei, reflekshoná un ratu riba eksperensia

di generashonnan di tur tempu,

konsiderá e bèrdatnan di bida,

ku nos antepasadonan a siña.

9Nos aki no sa, t'ayera nos a nase,

nos bida akibou ta kore pasa

mes lihé ku un sombra.

10Pero ta di nan bo por siña,

ta esnan ku eksperensia por papia.

11Akaso mangel por krese kaminda no tin humedat,

kaña kaminda no tin awa?

12Si awa seka

nan ta promé ku ta marchitá,

bèrdè ainda, sin ku por a ranka nan pa usa.

13Hende ku no tin atenshon pa Dios,

ta manera kaña ku no ta haña awa.

Hende sin Dios ta muri sin speransa.

14E ta pega su kurason na kos

ku ta kibra fásilmente.

Su seguridat ta mes frágil ku spenra.

15E ta stèns riba su prosperidat,

pero esaki no ta algu sólido;

su kurason ta pegá na su propiedat,

pero esaki no ta algu duradero.

16E ta manera mata ku ta bona,

den kalor di solo.

E vipénan ku e mata saka

ta spreit kore den henter e hardin,

17lora nan rais den piedra

i penetrá den blòki.

18Pero ora ranka nan for di ei,

e mes lugánan kaminda nan a pasa,

lo no ta ni kòrda nan mas.

19Ai sí, hende malbado,

t'esaki pa nan ta e bida bon;

awor otro hende ta bin tuma nan lugá.

Dios lo yuda Job si e ta fiel

20Dios no ta rechasá hende di kondukta ireprochabel;

E no ta duna man di malechornan forsa.

21Un añ' riba un dia E ta bolbe laga bo hari

i lo bo bolbe kanta di alegria;

22enkambio bo enemigunan sí,

Dios ta yena ku bèrgwensa

i E ta destruí kas di malbadonan.’