Salmo 24 - Papiamentu Bible 2013(PB13)

SALMO 24SEÑOR ta e Rei grandiSalmo di David.

1Henter mundu ta di Dios ku tur loke ta den dje,

tera ku tur hende ku ta biba riba dje.

2T'É a sigur'é den korientenan di awa.

3Ken lo por subi seru di SEÑOR?

Ken lo keda na e lugá sagrado?

4Esun ku ta limpi den su obra i pensamentu,

esun ku no ta loko tra'i fandanganan di mundu

i ku no sa hura falsu tampoko.

5Bendishon di SEÑOR ta pa un hende asina,

Dios, su Salbador, lo dun'é su derecho.

6Sorto di hendenan asina ta buska SEÑOR,

ta buska bo Kara, o Dios di Yakob!

7O portanan, hisa kabes;

alsa boso, portalnan antiguo,

pa Rei di gloria por drenta.

8Ta ken e Rei di gloria ta?

Ta SEÑOR, Esun fuerte i balente,

SEÑOR, triunfante den bataya!

9O portanan, hisa kabes;

alsa boso, portalnan antiguo,

pa Rei di gloria por drenta.

10Ta ken e Rei di gloria ta?

Esei ta SEÑOR di universo.

T'É ta Rei di gloria!