Job 34 - Papiamentu Bible 2013(PB13)

Di dos diskurso di ElihuElihu ta kritiká su amigunan

1E ora ei Elihu a sigui:

2‘Boso, hòmbernan tan sabí,

skucha mi palabranan!

Boso, hendenan tan studiá,

skucha mi!

3Pasobra hende mester averiguá,

loke su orea tende;

su lenga mester kùr,

loke e pruf.

4Ban konkluí pa nos mes

loke ta hustu;

ban disidí loke ta korekto den e kaso akí,

Elihu ta kritiká e pretenshon ku Job tin ku e ta inosente

5pasobra Job ta bisa:

“Mi ta inosente,

pero ta Dios ta impedí mi di haña un trato hustu.

6Maske mi tin rason,

ta konsiderá mi un gañadó;

maske mi ta sin falta,

Dios su flecha ta okashoná un herida

ku no ta kura.”

7Esaki sí ta un Job!

E ta hasi bofon di Dios manera nada!

Elihu ta duna testimonio di Dios su hustisia

8Job ta kompinchi di malbadonan;

man riba barika ku hende ku ta hasi malu.

9Pasobra e ta pretendé:

“Hende, ku hiba un bida

manera Dios ta deseá,

no ta gana nada ku esei.”

10P'esei, skucha mi,

boso ku tin asina tantu sano huisio!

No biba pensa mes ku Dios ta hasi malu

ku Todopoderoso ta hasi kos robes.

11Nò! E ta paga kada hende konforme su obra;

E ta manda p'e loke su kondukta meresé.

12Ta imposibel ku Dios por hasi kos malu,

ku Todopoderoso por trose hustisia.

13Akaso Dios a risibí su poder di otro hende?

T'un hende a enkarg'É ku mundu?

14Si E ke kita spiritu i rosea fo'i hende,

15n' ta tur ta muri sin eksepshon

i bolbe bira stòf atrobe?Elihu ta defendé soberania di Dios

16Si bo tin komprondementu, skucha e kos akí!

Tende loke mi ta bai bisa.

17Ta di bèrdè bo ta kere,

ku Dios por odia hustisia i tòg goberná?

Lo bo kondená Dios ku ta hustu i poderoso?

18No ta E ta bisa reinan:

“Boso ta sinbèrgwensa!”

i dignatarionan:

“Boso ta mal hende!”?

19Tur hende ta obra di su man,

p'esei E no ta tuma parti pa lidernan di pueblo,

ni no ta faboresé riku riba pober.

20Meianochi, den un fregá di wowo, nan ta muri;

ta shòk nan i nan ta laga bida;

poderosonan ta ranká fo'i bida

sin intervenshon di man humano.

21Pasobra SEÑOR su bista ta riba nan;

E ta wak kada paso ku hende dal.

22No ta eksistí niun lugá skur,

ni sikiera abismo di morto,

kaminda malechornan por skonde.

23Dios no ta revelá na hende

ki ora E ta bai dagfar nan.

24E ta plama poderosonan,

sin tin nodi di investigá

i ta pone otro na nan lugá.

25Pasobra E ta tuma nota di nan echonan,

den anochi e ta kita nan fo'i nan lugá

i destrosá nan.

26Públikamente E ta kastigá nan

pa nan maldat,

27pasobra nan a stòp di sigui su kaminda

i no a aktu E.

28Nan a laga hende pober grita

i e gritunan akí a yega te serka djE,

di manera ku El a tende e lamento di esnan den mester.

29-30Si Dios disidí di no hasi nada mes,

niun hende lo no por kritik'É.

Dios ta usa asta hende mentiroso,

ku ta bruha otro hende

i E ta laga nan goberná nashonnan.

Elihu ta papia ku Job pa e arepentí

31Tin hende ta bisa Dios:

“Mi ta kulpabel,

pero mi no ta bai peka mas.

32Mustra mi mi pikánan,

kometé inkonsientemente

i lo mi no hasi nan mas.”

33Anto awor ábo,

Dios mester rekompensá abo,

ounke bo nenga di arepentí?

Duna mi bo opinion,

tòg n' t'abo ta disidí?

No ámi!

34Hende ku sano huisio ta deklará,

hende sabí ku ta tende mi,

lo kontestá mi:

35“Job ta papia sin konosementu;

su palabranan ta sin sentido.”

36Mi gran deseo ta:

Mare por a tèst Job a fondo,

pasobra e ta rospondé manera hende malbado!

37No ta pekadó so e ta,

rebelde tambe!

Nos dilanti e ta burla di Dios,

diskutiendo sin fin kunÉ.’