Salmo 53 - Papiamentu Bible 2013(PB13)

SALMO 53Maldat i korupshon ta reina tur kaminda(Salmo 14)Pa maestro di kanto. Na weis di ‘Mahalat’. Poema didáktiko di David.

1Hende bobo ta bisa den nan mes:

‘Ai nò, no tin Dios!’

Kos mahos i teribel nan ta hasi,

ningun n' ta hasi bon.

2Dios ta mira abou for di shelu

riba yunan di hende,

pa weta si tin un ku tin sintí

i ku ta buska Dios.

3Pero tur a kohe mal kaminda,

tur a daña pareu.

Nò, ningun no ta hasi bon,

ni sikiera ún.

4Ma nan no sa nada antó,

e hasidónan di maldat,

ku ta kome mi pueblo bibu

komo si fuera ta pan

i ku nunka no ta resa na Dios?

5Te ora ku nan tembla di sustu,

di sustu sin motibu,

pasobra Dios ta plama wesunan di esnan

ku ta sera bo aden;

kon bo ta brongosá nan:

pasobra Dios ta rechasá nan!

6O, mare salbashon di Israel

por bini di Sion!

Ora Dios kambia suerte di su pueblo,

Yakob lo keda kontentu,

Israel lo ta di fiesta!