Echonan 18 - Papiamentu Bible 2013(PB13)

Un aña i mei na Korinte

1Despues di esaki Pablo a bandoná Atena i bai Korinte.

2Aya el a topa ku Akila, un hudiu ku a nase na Ponto. Akila a kaba di yega huntu ku su kasá Priskila for di Italia, pasobra emperador Klaudio a manda tur hudiu sali for di Roma. Pablo a bai bishitá nan

3i komo e tabata un trahadó di tènt meskos ku Akila, el a keda biba i traha serka nan.

4Tur sabat e tabata tene diskurso den snoa i tabata purba konvensé tantu e hudiunan komo e griegonan.

5Ora Silas i Timoteo a yega for di Masedonia, Pablo por a dediká su mes kompletamente na predikamentu; e tabata testiguá na e hudiunan ku ta Hesus ta e Mesias.

6Ora nan a sigui oponé n'e i asta a kuminsá hasi bofon di loke e tabata bisa, el a sakudí stòf kita for di su paña komo atvertensia na nan i a bisa: ‘Si boso bai pèrdí ta boso mes falta! Mi konsenshi ta limpi! Anto for di awor mi ta traha bou di e no hudiunan.’

7E ora ei el a sali for di snoa bai kas di Tito Hustu, un no hudiu ku tabata sirbi Dios. Su kas tabata keda pegá ku snoa.

8Krispo, kabesante di snoa, huntu ku tur su hendenan di kas a kere den Señor i hopi otro hende mas na Korinte a skucha e mensahe, kere i batisá.

9Un anochi Pablo a haña un vishon den kua Señor a bis'é: ‘No tene miedu; sigui papia i no keda ketu!

10Ami ta ku bo. Niun hende lo no por hasi bo daño, pasobra Mi tin hopi hende den e siudat akí ku ta pertenesé na Mi.’

11Asina antó Pablo a keda biba aya un aña i mei; e tabata siña e hendenan palabra di Dios.

12Ora Galio a bira gobernador romano di Gresia, e hudiunan a ataká Pablo na bòshi i hib'é dilanti di korte.

13Nan a bisa Galio: ‘E hòmber akí ta konvensé hende pa adorá Dios den un forma ku ta kontrali na lei!’

14Nèt ora Pablo tabata bai habri boka pa bisa algu, Galio a bisa e hudiunan: ‘Si tabata trata di violashon di lei òf un krímen serio, normalmente lo mi a mustra pasenshi ku boso ku ta hudiu.

15Ma komo boso diskushon tin di aber ku asuntu di siñansa, outoridat i e lei di boso ei, boso mes mira kiko boso ta hasi! Ami sí no ke ta hues den e tipo di kaso akí!’

16Anto el a kore ku nan for di korte.

17E ora ei nan a kohe Sostenes, kabesante di snoa, tene i batié dilanti korte. Ma Galio no a wòri su kabes.

Pablo ta regresá Antiokia na Siria

18Pablo a keda un temporada mas na Korinte i despues el a tuma despedida di e rumannan. El a subi bordo di un barku pa Siria, i Priskila i Akila a kompañ'é. El a laga feita su kabes den haf di Kengrea promé ku el a bai, pa motibu di un promesa ku el a hasi.

19Nan a pasa Éfese; el a laga Priskila ku Akila aya. E mes a bai den snoa i a debatí ku e hudiunan.

20E no a aseptá invitashon di e hudiunan ei pa keda mas largu,

21pero ora e tabata tuma despedida di nan, el a bisa: ‘Si ta Dios su boluntat, lo mi bolbe serka boso.’ Despues el a bolbe nabegá sali for di Éfese.

22Ora el a yega Sesarea, el a bai Herusalèm. Aya el a kumindá e iglesia i despues el a regresá Antiokia.

23El a keda un temporada aya.

Pablo di biahe pa Éfese, kapital di Asia Menor

Despues Pablo a bolbe bai for di Antiokia. El a biaha di un lugá pa otro den region di Galasia i Frigia. Tur kaminda ku e yega e tabata kurashá e disipelnan.

Apolo ta prediká na Éfese, despues na Korinte

24Un hudiu di Alexandria, un tal Apolo, a pasa Éfese. E tabata un hòmber elokuente, ku un konosementu profundo di Skritura.

25El a haña instrukshon tokante e kaminda di Señor i ku gran entusiasmo e tabata prediká i instruí korektamente tokante Hesus. Ma e tabata konosé solamente boutismo di Huan.

26E hòmber akí a kuminsá papia ku mashá kurashi den snoa. Ora Priskila i Akila a tend'é, nan a hal'é un banda i splik'é e kaminda di Dios na un forma mas bon.

27Na momento ku e ker a sigui biaha pa Gresia, e rumannan a kurash'é i skibi un karta pa e disipelnan aya risibié bon. Ora el a yega Korinte, e tabata un gran yudansa pa e rumannan, danki na e don spesial ku Dios a dun'é.

28Pasobra den debate públiko e tabata refutá e ponensianan di e hudiunan fuertemente i pa medio di Skritura e tabata proba ku Hesus ta e Mesias.