Zakarías 11 - Papiamentu Bible 2013(PB13)

Pueblonan i nan lidernan ta derotá

1Habri bo portanan, Libanon,

laga kandela kome bo sedernan.

2Keha, palunan di siprès,

pasobra a kap e sedernan,

e palunan enorme ei a bash'abou.

Keha, palunan di ekel di Bashan,

pasobra a kap e boske será.

3Skucha kon e wardadónan ta sklama,

pasobra nan kunukunan di yerba ta destruí.

Skucha kon e leonnan ta grita,

pasobra nan boske kantu di Yordan ta destrosá.

E dos wardadónan

4T'esaki SEÑOR, mi Dios, ta bisa: ‘Pasa pa wardadó dje karnénan destiná pa matadero.

5Kumpradó dje karnénan ta mata nan sin sinti nan mes kulpabel. Bendedó ta bisa: “Alabá sea SEÑOR, negoshi a bai bon!” Wardadó dje karnénan tampoko no tin duele di nan.’

6SEÑOR ta deklará: ‘Ami no tin duele mas di habitantenan di mundu; mi ta entregá nan den poder di otro i di nan reinan. E reinan lo destruí mundu, pero Ami no ta salba niun hende for di nan poder.’

7E ora ei mi a bira wardadó den servisio di negosiante di karné destiná pa matadero. Mi a kohe dos garoti. Unu mi a yama ‘Kariño’ i e otro mi a duna e nòmber di ‘Union’. Di e manera akí mi a pasa pa wardadó di karné.

8Den un luna mi a kaba ku tres wardadó. Pero mi a pèrdè pasenshi ku e karnénan i nan tambe a fada di mi.

9E ora ei mi a bisa: ‘Mi no ke ta boso wardadó mas. Si tin karné ku tin ku muri, lag'é muri numa. Esun ku tin ku pèrdè lag'é keda pèrdí numa i esunnan ku sobra por bien kome otro.’

10E ora ei mi a kibra mi garoti ‘Kariño’ na dos, pa di e manera ei mi kibra tambe e aliansa ku SEÑOR a sera ku tur pueblo.

11E mes dia ei a kibra e aliansa. I e negosiantenan di karné destiná pa matadero ku tabatin mi na bista, a komprondé ku tabata un òrdu di SEÑOR.

12Mi a bisa nan: ‘Si boso ke, boso ta paga mi mi suèldu, sino, laga numa.’ Nan a paga mi e suèldu: trinta moneda di plata.

13SEÑOR a bisa mi: ‘Antó t'e suma bunita akí nan ta haña ku Mi ta bal? Hib'é numa pa e persona ku ta dirti metal.’ Mi a hiba e trinta moneda di plata tèmpel i a tira e persona akí kuné.

17Ai di e wardadó ku no ta sirbi,

ku ta bandoná su trupa di karné!

Spada lo kita su brasa drechi afó

i saka su wowo drechi!

Su brasa drechi lo seka kompletamente,

su wowo drechi lo bira kompletamente skur.’