Proverbionan 27 - Papiamentu Bible 2013(PB13)

1No kana blòf kiko bo ta bai hasi mañan,

pasobra bo n' sa kiko un dia por trese.

2Laga otro hende gaba bo, no bo mes boka,

otro hende, no bo mes lepnan.

3Santu ta pisá i piedra ta pisa hopi;

pero disgustu pa motibu di un hende bobo ta pisa bo mas.

4Ira ta kruel i rabia por hoga bo,

pero ken por resistí yalurs?

5Mihó un skual den bo kara,

ku amor skondí.

6Bo por konfia e amigu ku ta hùrt bo

mas ku e enemigu ku ta sunchi bo.

7Hende barika yen ta laga e miel di mas dushi para,

pero p'esun ku tin hamber, e kos di mas marga ta sut.

8Manera un para ku dualu bai for di su nèshi

asina e hende ku dualu bai fo'i kas, ta.

9Dushi di kòmbersashon k'un amigu ta sinseridat,

e ta manera un masashi ku zeta kostoso

i un pasatempu den un kamber ku perfume dushi di sensia ta pone hole dushi.

10No bandoná bo amigu ni e amigu di bo tata,

no bai kas di bo ruman ora ta bai bo malu,

mihó un bon bisiña ku un amigu leu.

11Mi yu, biba sabí, lo ta un legria pa mi;

pasobra ora hende hasi bofon di mi pa bo motibu, mi tin kos di bis'é.

12Un hende sabí a mira peliger i buska kamind'i skonde,

un bobo a bai riba dje i sufri daño.

13Tuma mantel di esun ku ke para bòrg pa un strañero,

keda ku e mantel si ta pa un muhé strañero e ta para bòrg.

14Si un hende tur mainta ora e lanta, grita bendishoná su bisiña,

e bisiña por tum'é na malu.

15Un dak ku ta lèk riba un dia di awa: awa ta keda lèk.

Esei e muhé ku tur ora bai ta buska kestion parse.

16Ke dominá un muhé asina ta manera ke kohe bientu tene

òf ke tene zeta den man.

17Manera ta mula heru ku heru

asina hende ta hasi punta di bista di su amigu mas krítiko.

18Es ku kuida e pal'i figo ta kome figo,

es ku kuida su shon ta keda elogiá.

19Manera awa ta reflehá un kara

asina kurason di hende ta reflehá e hende.

20Reino di morto ta un abismo insatisfecho;

meskos hende: loke su wowo mira, e ke.

21Manera kandela ta afiná oro i plata,

bon nòmber di un hende ta proba ken e ta.

22Maske bo bati un hende bobo den un fènsu,

batié manera ta bati maishi k'un man di fènsu,

bo n' ta saka su bobedat fo'i dje.

23Kuida salú di bo tou di bestia, paga tinu na bo karnénan i kabritunan.

24Pasobra rikesa no ta dura pa semper. Akaso rikesa i prosperidat t'ei pa semper?

25Ora kab'i kòrta yerba pa bestia i yerba nobo ta krese atrobe, i e yerba riba seru ta kòrtá,

26bo tin bo karnénan pa duna bo lana pa traha paña, bo chubatunan pa bende pa haña sèn pa kumpra tereno

27i bo kabritunan pa duna abo, bo famia i esnan ku ta traha pa bo, lechi na abundansia pa bebe.