Isaías 12 - Papiamentu Bible 2013(PB13)

Kanto di alabansa

1Ora e tempu ei yega lo bo bisa:

‘Mi ta gradisí Bo, SEÑOR,

pasobra maske Bo tabata rabiá ku mi,

bo rabia a baha

i Bo a duna mi konsuelo.

2Mira kon Dios a salba mi,

tur mi konfiansa ta den djE,

mi n' tin miedu:

SEÑOR Dios ta mi forsa, mi refugio.

E mes t'Esun ku a salba mi.’

3Ku legria boso lo saka awa

for di fuentenan di bida.

4Ora e tempu ei yega boso lo bisa:

‘Ban gradisí SEÑOR,

ban proklamá ta ken E ta;

laga tur pueblo konosé su obranan,

anunsiá ku su nòmber ta elevá

riba tur sobrá.

5Kanta i toka na SEÑOR su honor:

kosnan grandi El a hasi!

Laga henter mundu tende esaki.

6Dal gritu di legria i di húbilo

boso tur bibá na Sion,

pasobra grandi E ta,

Esun ku ta biba meimei di boso,

e Dios Santu di Israel.’