Salmo 71 - Papiamentu Bible 2013(PB13)

SALMO 71Awor ku mi ta bieu, no bandoná mi, SEÑOR!

1SEÑOR, serka Bo mi ta skonde,

hasi pa nunka mi no keda brongosá.

2Bo ta hustu: salba mi i libra mi,

pone atenshon i salba mi!

3Abo sea un baranka di refugio,

kaminda mi por bai tur ora;

Bo a disidí di salba mi,

pasobra Bo ta mi baranka, mi baluarte.

4Mi Dios, salba mi for di man di pekadó,

for di gara di malbado i opresor.

5Pasobra Bo ta mi speransa, SEÑOR Dios,

mi refugio for di tempu mi ta mucha.

6Fo'i ten m'a nase mi a lèn riba Bo,

mi Yudador fo'i barika di mi mama.

Na Bo mi alabansa pa semper!

7Pa hopi hende man di Dios a toka mi,

ma Bo ta mi refugio fuerte.

8Mi boka ta yen di alabansa

di bo splendor, tur dia di nobo.

9No rechasá mi, awor ku mi ta bieu;

mi forsa ta bai, no bandoná mi!

10Pasobra mi enemigunan ta papia riba mi,

nan ta wak mi, ta bati kabes huntu

11i ta bisa: ‘Dios a bandon'é,

ban kore su tras koh'é,

e no tin hende pa salb'é!’

12O Dios, no keda leu fo'i mi,

mi Dios, bin yuda mi lihé!

13Bèrgwensa i ruina riba esnan

ku ta persiguí mi sin fin!

Mare esnan ku ta buska mi desgrasia

por ta tapá ku bèrgwensa i konfushon.

14Ma ami lo no keda sin konfia,

lo mi alabá Bo mas i mas;

15Mi boka lo anunsiá bo hustisia,

bo salbashon, tur dia di nobo,

pasobra mi no sa su midí;

16lo mi konta di bo forsa, SEÑOR Dios,

i proklamá bo hustisia sin igual.

17Dios, fo'i mi hubentut Bo a siña mi

i te ainda mi ta gaba bo gran obranan.

18P'esei awor ku mi ta bieu ku kabei blanku,

no bandoná mi tampoko, o Dios,

te ora ku m'a kaba di konta

di bo forsa i bo obranan grandi

na tur hende di awor i di mañan.

19Dios, bo hustisia ta yega te na shelu,

esta kos grandi Bo a hasi!

Dios, ken ta manera Bo?

20Ounke Bo a pèrmití pa mi a wanta

hopi mizeria pisá,

lo Bo bolbe duna mi bida

i lo lanta mi for di fondo di tera.

21Mustra mi bo gran fabor

i bolbe duna mi konsuelo.

22Anto lo mi alabá Bo ku arpa,

alabá bo fieldat, o mi Dios.

Lo mi toka lira na bo honor,

Abo, Dios Santu di Israel.

23Ora ku mi kanta salmo pa Bo,

mi lepnan lo bai hubilá,

sí, henter mi ser ku Bo a salba.

24Henter dia mi lenga lo move

keda menshoná bo hustisia;

pasobra brongosá i humiliá

lo ta esnan ku ta buska mi desgrasia.