1 Krónikanan 28 - Papiamentu Bible 2013(PB13)

David ta enkargá Salomon ku konstrukshon di tèmpel

1David a yama tur e lidernan di Israel huntu na Herusalèm:

e kabesnan di tribu, e komandantenan di e diferente divishonnan di ehérsito, e òfisirnan di alto rango i di rango mas abou, esnan ku tabata enkargá ku propiedat i bestia di kria di rei i di su yu hòmbernan, tambe e funshonarionan di korte, e sòldánan balente i tur otro persona importante.

2E ora ei David a lanta para i bisa: ‘Mi rumannan i mi pueblo, skucha. Mi mes tabatin intenshon di traha un kas kaminda e arka di aliansa di SEÑOR, e banki di pone pia di nos Dios, lo por keda pa semper. Mi a hasi preparashon pa e konstrukshon.

3Pero Dios a bisa mi: “Mi ta prohibí bo traha un tèmpel na mi honor, pasobra bo a bringa den hopi guera i drama sanger.”

4Tòg SEÑOR, Dios di Israel, a skohe ami den henter mi famia pa ta rei di Israel pa semper. Pasobra El a skohe tribu di Huda pa ta hefe di Israel. Den tribu di Huda El a skohe mi famia i den e yu hòmbernan di mi tata El a hiba di gustu di skohe ami, di manera ku El a hasi mi rei di henter Israel.

5Den tur mi yu hòmbernan — i SEÑOR a duna mi hopi — El a skohe mi yu Salomon pa sinta riba trono di SEÑOR ku ta goberná Israel.

6SEÑOR a bisa mi: “Bo yu Salomon lo traha e tèmpel ku su plenchinan pa Mi. T'e Mi a skohe: lo e ta un yu pa Mi i Ami un tata p'e.

7Lo Mi laga su reino keda firme pa semper, si e aten'é na mi mandamentunan i mi reglanan,2 Samuel 7:1-16; 1 Krónikanan 17:1-14 manera e ta hasi awor akí.”

8P'esei den presensia di henter Israel, e pueblo di Dios, i dilanti di nos Dios, ku ta mira i tende nos, mi ta roga boso: “Kumpli estriktamente ku e mandamentunan di SEÑOR, boso Dios, ya boso lo keda ku e pais bon akí i semper boso lo por duna boso yu hòmbernan e komo herensia.”

9I abo, mi yu Salomon, rekonosé i stima e Dios di bo tata, sirbiÉ di henter bo alma i ku un kurason dispuesto, pasobra SEÑOR ta skrudiñá tur kurason i tur loke hende por pensa. Si bo busk'É, lo E laga bo hañ'É; pero si bo bandon'É, lo E rechasá bo pa semper.

10Kòrda ku SEÑOR a skohe abo pa traha un santuario p'E. Sea disididu i kuminsá traha.’

11Despues David a entregá su yu Salomon modelo di e portal di tèmpel i di e edifisio di tèmpel mes, ku su kambernan di warda tesoro, su kuartunan ariba i su salanan interior i e sala pa pone e arka, kaminda Dios ta rekonsiliá hende kunÉ.

12Tambe David a duna Salomon e modelonan ku Spiritu di Dios a inspir'é: pa e plenchinan di tèmpel di SEÑOR i pa tur e kuartunan ku mester traha rònt di dje, pa e kambernan di tesoro di tèmpel i esnan di e ophetonan konsagrá na SEÑOR.

13Tambe el a dun'é instrukshon kon ta organisá e saserdotenan i e levitanan, pa e sirbishinan den tèmpel i e modelonan di tur e ophetonan ku ta usa e ora ei.

14Ademas David a duna e peso eksakto di oro i di plata nesesario pa e ophetonan ku mester a usa ora di e diferente sirbishinan,

15es desir e peso di oro i di plata nesesario pa e kandelarnan di oro i esnan di plata ku nan lampinan,

16ademas e peso di oro nesesario pa e mesa pa pone pan konsagrá i e kantidat di plata pa e mesanan di plata.

17Ademas el a duna oro puru pa e fòrkinan, e kòmchinan pa sprengu awa òf sanger i pa e kanikanan; tambe e peso pa kada beker di oro, i esun pa kada beker di plata.

18Finalmente oro refiná pa e altá pa kima sensia i pa e modelo di e garoshi ku e kerubinnan, ala habrí ku ta tapa e arka di aliansa ku SEÑOR.

19‘Tur e kosnan akí,’ David a bisa, ‘ta den un Skritura ku mi a risibí di SEÑOR, kaminda El a duna mi instrukshon kon ta ehekutá e plan di konstrukshon.’

20Un bia mas David a dirigí su mes na Salomon i a bisa: ‘Sea disididu, tuma un kurashi i kuminsá traha, no tene miedu i no pèrdè ánimo, pasobra SEÑOR Dios, mi Dios, ta ku bo. Lo E no bira lomba pa bo, ni bandoná bo, lo E yuda bo te ora tur trabou na su tèmpel ta kla.

21E diferente gruponan di saserdote i levita ta para kla pa kumpli ku nan tarea den tèmpel. Bo mes ta disponé di hòmbernan di fishi ku ta dispuesto pa hasi tur e trabounan i tambe e pueblo i su lidernan ta na bo disposishon.’

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help