Numbernan 34 - Papiamentu Bible 2013(PB13)

E fronteranan di e pais Israel

1SEÑOR a bisa Moises

2pa ordená e israelitanan lo siguiente: ‘Ora boso yega Kanaan, e pais ei ku boso ta haña komo propiedat lo tin e siguiente fronteranan:

3E frontera zùit ta kore banda di teritorio di Edom bai desierto di Sin. E ta kuminsá den ost na e punta zùit di Laman Morto.

4Ei e ta lora den direkshon zùit bai Pasashi di Skarpion sigui bai Sin. E ta sali zùit di Kadesh-Barnea sigui bai Hasar-Adar i Asmon.

5Di Asmon e frontera ta lora bai Roi di Egipto bai sali den Laman Mediteráneo.

6E frontera wèst lo ta kosta di e laman akí.

7E frontera nort ta kore asin'akí: Hala un liña for di Laman Mediteráneo bai seru di Hor

8i for di seru di Hor te na e kaminda di bai Hamat. E frontera ta sali na Sedad,

9bai Zifron i kaba na Hasar-Enan. Esei ta e frontera nort.

10Hala pa e frontera ost un liña for di Hasar-Enan bai Shefam.

11Di Shefam e frontera ta kore den direkshon zùit bai Ribla, na parti ost di Ain, i sigui pegá banda di e serunan na parti ost di Lago di Kinerèt.

12E ta sigui bai den direkshon zùit banda di Yordan te na Laman Morto.’

13Despues Moises a bisa e israelitanan: ‘Esei awor ta e pais ku boso mester tira lòt parti entre boso. SEÑOR a ordená pa dun'é na nuebe tribu i mitar.Lista di e personanan responsabel pa partimentu di e pais

16SEÑOR a bisa Moises:

17‘Saserdote Eleazar i Yozue, yu hòmber di Nun, mester parti e pais entre boso.

18Nombra ademas un hefe for di kada tribu pa yuda parti e pais.

19Ata nan nòmbernan:

Kaleb, yu hòmber di Yefune, for di tribu di Huda.

20Shemuel, yu hòmber di Amihud, for di tribu di Simeon;

21Elidad, yu hòmber di Kislon, for di tribu di Benhamin;

22Buki, yu hòmber di Yogli, for di tribu di Dan;

23Haniel, yu hòmber di Efod, for di tribu di Manase;

24Kemuel, yu hòmber di Shiftan, for di tribu di Efraim;

25Elisafan, yu hòmber di Parnak, for di tribu di Zebulon;

26Paltiel, yu hòmber di Azan, for di tribu di Isakar;

27Ahihud, yu hòmber di Shelomi, for di tribu di Asher;

28Pedael, yu hòmber di Amihud, for di tribu di Naftali.’

29Esakinan ta e hòmbernan ku SEÑOR a ordená pa parti Kanaan entre e israelitanan.