Job 22 - Papiamentu Bible 2013(PB13)

Di tres diskurso di ElifazElifaz ta akusá Job di krímennan kontra hende pober

1E ora ei Elifaz a bolbe tuma palabra:

2‘Kiko hende por hasi ku ta resultá útil pa Dios?

Job, bo ta kere ku asta e hende di mas sabí,

por ta útil pa Dios?

3Akaso Dios Todopoderoso tin benefisio,

si abo ta un bon hende?

Kiko Dios ta gana si bo biba un bida perfekto?

4O akaso bo temor p'E ta e motibu,

ku E ta hiba bo dilanti di rat?

5Nò, ta pasobra bo a hasi asina tantu piká

i ta sigui ku nan ketu bai!

6Bo a hasi malu di fia bo próhimo sèn

i kita nan poseshonnan fo'i nan

ora nan no por a paga bo.

Asta bo a tuma nan paña fo'i nan,

laga nan blo sunú.

7Hende morto di hamber i set

bo a nenga awa i pan,

8ounke bo tabata poderoso, bon pará,

doño dje tereno, kaminda bo tabata biba.

9Ora biudanan a pidi bo yudansa

bo a kore ku nan

i bo a maltratá wérfanonan.

10P'esei awor trampa ta rondoná bo,

teror inesperá ta poderá di bo.

11Rònt di bo ta bira skur, bo n' ta ripará?

Un lawin'i awa ta inundá bo.

Elifaz ta akusá Job di ta kere ku Dios no ta mira su mal echonan

12Akaso Dios no ta biba altu den shelu,

mas altu ku tur strea leu ayá?

13Pero abo ta bisa: “Bon mirá, kiko Dios sa?

Su bista por penetrá e nubianan skur

pa E por husga?”

14Bo ta kere ku e nubianan skur ta impediÉ di mira,

segun E ta kana na ekstremonan di shelu?Elifaz ta akusá Job di ta sigui kaminda di hende malbado

15Job bo a disidí di sigui e kamindanan bieu,

e kamindanan di hende malbado?

16Hende manera abo ta ranká for di bida

promé ku nan tempu,

suela ta habri bou di nan,

17pasobra nan ta bisa Dios: “Hala kita!”

òf: “Dios Todopoderoso por mishi ku mi antó?”

18Nan ta pensa asina,

ma ta Dios mes a yena nan kasnan ku kos bon.

Ami sí no ta pensa manera nan!

19Hende hustu ta alegre,

hende inosente ta hari aliviá

ora nan mira kon e malbado ta haña kastigu.

20Henter propiedat dje hende malbado ta destruí

i loke sobra kandela ta kome.

Elifaz ta insistí pa Job légumai maldat, bolbe serka Dios i haña rekompensa

21Someté bo na Dios i keda na pas kunÉ;

di e manera akí lo bo bolbe haña prosperidat.

22Laga E instruí bo;

graba su siñansa den bo mente.

23Si bo arepentí i bai bèk serka Dios Todopoderoso

lo E restourá bo;

Pasobra si bo saka maldat benta leu,

24lòs bo oro for di bo kurason,

sí, tambe bo oro di mas fini di Ofir,

25e ora ei Dios Todopoderoso lo bira bo oro,

Lo E bira monton di plata pa bo.

26Ku siguransa e ora ei lo bo tin goso den Todopoderoso

i lo bo por mir'É ku konfiansa.

27Lo bo resa n'E, l'E skucha bo

i abo lo kumpli ku bo promesanan.

28Lo bo tin éksito den tur loke bo hasi,

kaminda bo bai semper lo tin klaridat.

29Di eksperensia lo bo por duna otro hende

ku ta den sirkunstansianan pisá, konseho, bisando:

“Lant'ariba!”

Dios lo salba hende humilde.

30SEÑOR lo salba asta un hende ku no ta inosente,

pa motibu di bo mannan limpi.’