Salmo 55 - Papiamentu Bible 2013(PB13)

SALMO 55Ta mi amigu mes a traishoná miPa maestro di kanto. Ku kompañamentu di instrumèntnan di kuèrdè. Poema didáktiko di David.

1O Dios, skucha mi orashon,

no hasi surdu pa mi súplika!

2Hasi kaso di mi, kontestá mi,

mi ta kana keha, sin sosiegu,

3aríbabou di gritamentu di enemigu,

di e opreshon pa man di pekadó;

nan ta baha desaster riba mi,

furioso nan ta sigui ataká mi.

4Mi kurason ta krem den mi paden,

ansha di morto ta kai riba mi;

5miedu, temblamentu ta kohe mi,

un spantu enorme ta drenta mi.

6Mi di:

si mi tabatin ala manera un palomba,

lo m'a bula bai i lo mi tabata trankil.

7Sí, lo m'a bula bai mashá leu,

kualke kaminda den desierto lo m'a keda.

8Mesora lo m'a buska protekshon ayanan

kontra tempestat, kontra orkan.

9Destruí nan, Señor, bruha nan lenga,

pasobra den siudat mi ta mira

violensia i pleitu patruyando

10riba murayanan di dia i anochi;

den stat mes ta reina krímen i mizeria,

11ayaden ta yen di destrukshon;

violensia brutu i engaño

no ke kita for di riba kaya.

12Ai, no ku un enemigu ta insultá mi

— lo mi por a wanta esei —

o ku un rival ta lanta kontra mi,

— lo mi por a skonde p'e —

13ma t'abo, un di mi hendenan,

mi amigu, hòmber di konfiansa!

14Nos ta'ta biba na grasia ku otro;

kon nos tabata bai kas di Dios

meimei di e muchedumbre di fiesta…

15Laga morto kohe nan di sorpresa,

ku nan por kai bibu den abismo,

komo maldat ta na kas serka nan.

16Ma ami, mi ta sklama na Dios,

SEÑOR lo trese mi salbashon.

17Anochi, mainta i mèrdia

mi ta grita yora i keha:

i enberdat E ta tende mi stèm.

18E ta duna mi libertat i pas

for di esnan ku ta bringa ku mi,

nan ku ta hopi, miéntras ami ta so.

19Dios ta skucha mi, lo E humiliá nan,

E ku ta reina fo'i prinsipio,

pasobra nan no ke arepentí,

rèspèt pa Dios nan no tin.

20Mi kompañero a hisa man kontra hende

ku tabata na pas kuné,

el a kibra laso di amistat.

21Su boka ta mas moli ku manteka,

ma su kurason ta buska guera;

su palabranan ta suave ni zeta,

ma ta puñánan saká for di baliña.

22Tira bo preokupashon riba SEÑOR,

E mes lo perkurá pa bo:

nunka lo E no pèrmití

pa un hende hustu trompeká.

23Ma Bo ta laga e otronan, o Dios,

baha den pos yen di putrishon.

Hende ku ta mata i gaña

no ta kumpli ni mitar di nan añanan,

pero ami ta konfia den Bo.