Proverbionan 3 - Papiamentu Bible 2013(PB13)

1Mi yu, no lubidá loke mi ta siña bo,

atené bo na mi mandamentunan.

2E ora ei lo bo tin un bida dushi,

un bida largu i felis.

3Sòru pa semper bo ta fiel i ta papia bèrdat;

bisti fieldat i bèrdat manera un kadena na bo garganta,

graba nan den bo mente.

4E ora ei lo bo ta bon mirá

tantu serka Dios komo serka hende.

5Konfia den SEÑOR ku henter bo kurason

i no sea tèrko.

6Tene kuenta kunÉ den tur loke bo hasi

i lo E mustra bo e kaminda korekto.

7Stòp ku terkedat,

respetá SEÑOR i bira lomba pa maldat.

8Esei ta un remedi ku ta laga bo keda salú,

algu ku ta refreská bo kurpa.

9Honra SEÑOR ku ofrendanan for di tur loke bo ta poseé,

dun'É e mihó parti di bo kosecha.

10E ora ei bo mangasinanan lo yena kankan

i bo bakinan di fangu biña lo yena te basha afó.

11No despresiá korekshon ku bini di SEÑOR,

i no disgustá ora E kastigá bo.

12Pasobra SEÑOR ta koregí esun ku E ta stima,

meskos ku un tata ta koregí su yu stimá.

13Felis esun ku haña sabiduria

i optené inteligensia.

14Pasobra sabiduria ta mas benefisioso ku plata

i ta hasi bo mas riku ku oro por hasi bo.

15E tin mas balor ku piedra presioso;

maske kiko hende antohá,

kompará ku sabiduria

e ta ñaña.

16Ku man drechi e ta ofresé bida largu,

ku man robes rikesa i honor.

17Ta mashá agradabel pa sigui sabiduria su pasonan;

bo ta biba na pas ora bo kana riba su bereanan.

18Pa esnan ku koh'é tene duru

e ta un palu ku ta duna bida,

felis esun ku dal tene sabiduria duru sin ke lag'é bai.

19Pasobra ku sabiduria SEÑOR a konstruí mundu,

ku inteligensia El a traha shelu.

20Dor di su konosementu El a krea laman

i ta laga serena choria for di nubia.

21Mi yu, warda sano huisio i diskreshon.

No pèrdè nan fo'i bista.

22Nan lo ta pa bo manera un fuente di bida

i drecha bo karakter manera un kadena ta drecha bo aparensia.

23E ora ei bo por sigui bo kaminda trankil,

e ora ei lo bo no trompeká.

24Ora bo kai drumi,

sustu lo no lanta bo,

lo bo drumi trankil.

25No tene miedu di desaster repentino

òf di ruina ku ta sorprendé mal hende.

26Pasobra SEÑOR lo yuda bo,

E ta protegé bo,

warda bo di pèrdishon.

27Ora ta dependé di bo,

no retené kos bon for di esnan ku meres'é.

28No bisa:

‘Ai, bini bèk mañan,

e ora ei mi ta duna bo e’,

siendo bo tin e.

29No plania maldat kontra bo próhimo,

siendo e ta biba band'i bo sin ta sospechá nada.

30No buska pleitu sin motibu

ku hende ku no a hasi bo nada malu.

31No envidiá mal hende

i sigur no sigui nan ehèmpel.

32Pasobra SEÑOR ta repudiá

esnan ku no ke tin di aber kunÉ,

pero ku esnan ku ta tende di djE

E ta anda ku konfiansa.

33SEÑOR ta maldishoná kas di mal hende,

pero ta bendishoná hogar di hende hustu.

34E ta hasi chèrchè di chèrchadónan orguyoso,

pero humildenan E ta duna su grasia.

35Hende sabí ta heredá honor,

pero hende bobo E ta pone pasa bèrgwensa.