Echonan 17 - Papiamentu Bible 2013(PB13)

Hostilidat na Tesalónika

1Pablo i Silas a sigui nan biahe via Amfípolis i Apolonia pa asina yega Tesalónika, kaminda tabatin un snoa.

2Manera kustumber, Pablo a bai einan i durante tres sabat tras di otro el a diskutí ku e hendenan.

3El a splika i mustra nan ku segun Skritura e Mesias mester a sufri i lanta for di morto. El a bisa nan: ‘E Hesus ku mi ta proklamá na boso ta e Mesias.’

4Algun di nan a keda konvensí i a djòin Pablo i Silas; tambe un grupo grandi di no hudiu ku tabata sirbi Dios, i hopi muhé prominente.

5Ma e hudiunan a bira yalurs; nan a buska algun agitadó pa forma un ribirishi; henter e siudat tabata aríbabou. Nan a ataká kas di Yason, pasobra nan ker a entregá Pablo i Silas na e reunion plenario di pueblo.

6Ora nan no a haña nan, e hendenan a lastra Yason mes i algun kreyente hiba nan serka outoridatnan di e siudat; nan tabata grita: ‘E hòmbernan ei a pone henter mundu ariba abou, anto awor nan a bini akinan!

7I Yason a risibí nan den su kas! Nan tur ta bai kontra lei di emperador, pasobra nan ta bisa ku tin otro un rei ku yama Hesus.’

8Ku e palabranan akí nan a pone e pueblo i e outoridatnan bira tur sobresaltá.

9Ma e outoridatnan a laga Yason i e otronan bai, despues di a tuma un suma serka nan komo bòrg.

Na Berea Pablo ta gana mas ruman pero tambe mas enemigu

10Asina a bira nochi e rumannan a manda Pablo i Silas Berea. Ora nan a yega aya, nan a bai snoa.

11E hendenan djei tabata mas habrí ku esnan di Tesalónika. Nan tabata skucha e mensahe ku hopi zelo i tabata skrudiñá Skritura diariamente pa mira si e kosnan ku Pablo tabata bisa tabata bèrdat.

12P'esei hopi di nan a bini na fe, huntu ku hopi hende griego, tantu hende muhé di alto kategoria komo hende hòmber.

13Ma ora e hudiunan di Tesalónika a tende ku Pablo a proklamá Dios su palabra na Berea tambe, nan a bini ei tambe bin trese bruhashon i ribirishi den e pueblo.

14Mesora e rumannan a manda Pablo kosta, ma Silas i Timoteo sí a keda na Berea.

15Esnan ku a eskoltá Pablo a hib'é Atena. Despues nan a bai bèk ku e rospondi di Pablo ku Silas i Timoteo mester djòin e mas pronto posibel.

Diskurso di Pablo dilanti di Areo Pago, e konseho di Atena

16Miéntras Pablo tabata warda nan na Atena, el a sintié mashá malu ora el a mira e kantidat di ídolo ku tabatin den e siudat.

17P'esei e tabata papia den snoa ku e hudiunan i e no hudiunan ku tabata adorá Dios, i riba Agora, e plasa públiko, e tabata papia tur dia ku e hendenan ku tabata pasa eibanda.

18Tambe tabatin algun filósofo epikureo i stoisista ta diskutí kuné i algun di nan a bisa: ‘Kiko e papiadó di kos di loko ei ke bisa?’ Algun otro a bisa: ‘Parse ku e ta un predikadó di dios strañero.’ Nan a bisa asina, pasobra Pablo tabata prediká e bon notisia tokante Hesus i tokante resurekshon.

19P'esei nan a kohe Pablo i hib'é dilanti di Areo Pago. Aya a puntr'é: ‘Nos por sa kiko e siñansa nobo ku bo ta papia di dje ta?

20E kosnan ku bo ta papia ta zona straño den nos orea, p'esei nos ke sa kiko nan ke men.’

21Awor ta asina ku tantu e hendenan di Atena komo e strañeronan ku tabata biba ei tabata gusta pasa tempu ku kontamentu i skuchamentu di novedat.

22Pablo a lanta para dilanti di konseho di Areo Pago i bisa: ‘Habitantenan di Atena, den tur kos mi ta mira ku boso ta hende mashá religioso.

23Pasobra ora mi tabata kana rònt den boso siudat i tabata opservá boso santuarionan, asta mi a topa un altá ku e inskripshon: “Na un dios deskonosí”. Wèl, loke boso ta adorá sin konosé, ami ta anunsiá boso.

24Dios ku a krea universo i tur loke e ta kontené, e Señor di shelu i tera, no ta biba den tèmpel trahá pa man di hende.

32Ora nan a tende Pablo papia di resurekshon di morto, algun di nan a hasi bofon di dje; ma otro a bisa: ‘Nos ke tende mas di esei un otro bia.’

33Asina Pablo a bandoná e reunion.

34Algun hende a djòin Pablo i aseptá fe; entre nan tabatin Dionisio, un miembro di e Areo Pago, un muhé ku yama Damaris i algun otro hende mas.