Salmo 79 - Papiamentu Bible 2013(PB13)

SALMO 79Un kalamidat a asotá nos pueblo. Unda Bo ta, SEÑOR?Salmo di Asaf.

1Paganonan, o Dios, a invadí bo propiedat,

nan a profaná bo tèmpel santu,

laga Herusalèm bira un ruina.

2Kurpa di bo sirbidónan nan a laga

komo kuminda pa para di shelu,

karni di bo fielnan pa bestia feros.

3Manera awa nan a basha nan sanger

tur kaminda rònt di Herusalèm;

no tabatin ningun pa dera morto.

4Nos a bira mofa di bisiña,

tur hende ku biba rònt di nos

ta pil di nos, ta insultá nos.

5Te ki dia, SEÑOR!

Bo ta sigui rabia pa semper?

Yalurs ta sigui kima bo paden

manera ta kandela?

6Baha bo rabia riba e nashonnan

ku no ke rekonosé Bo,

riba e reinonan kaminda nunka

nan no ta invoká bo nòmber,

7pasobra nan a devorá Yakob

i a ruiná su teritorio.

8No laga nos paga pa e pikánan

ku nos antepasadonan a hasi;

bo kompashon sali lihé na nos enkuentro,

pasobra nos a pèrdè tur forsa.

9Abo, yuda nos, Dios Salbador,

pa gloria di bo nòmber!

Salba nos i kita nos pikánan

pa gloria di bo nòmber.

10Ki mishi paganonan bisa:

‘Unda nan Dios ta?’

Mare ku dilanti di nos bista

paganonan por yega na sinti

kon Bo ta venga e sanger

ku bo sirbidónan a drama.

11Skucha keho dje prezunan

i libra ku bo brasa poderoso

esnan kondená na morto.

12Paga nos bisiñanan shete be bèk

e ultrahe ku kua nan a falta Bo, Señor!

13Anto nos, nos ku ta bo pueblo,

e karnénan ku Abo ta kuida,

lo gradisí Bo pa tur eternidat

i lo kanta bo alabansa den tur generashon.