Isaías 21 - Papiamentu Bible 2013(PB13)

Profesia riba kaida di Babilonia

1Dios ta bai baha pisá riba Babilonia, e Desierto na Riu.

Manera warwarú ku ta ranka bini for di desierto,

asina desaster ta bini for di sabana,

for di un pais spantoso.

2Teribel ta loke Dios ta laga mi mira i tende!

Elamitanan, ataká!

Habitantenan di Media, sitia e siudat!

Tòg traidor sa traishoná,

destruktor sa destruí!

Mi ta bai pone un fin na tur kehamentu

ku Babilonia ta okashoná.

3P'esei mi paden ta kue kram,

doló ta dal mi manera e ta dal un muhé na parto.

Mi kurason ta krem pa loke mi ta tende,

mi ta sobresaltá pa loke mi ta mira.

4Mi kurason ta bati duru,

sustu ta drenta mi;

nochesitu su freskura, ku tantu mi gusta,

ta motibu di spantu pa mi.

5Mi ta mira:

na Babilonia ta drecha mesa

ta habri tapeit,

ta kome i bebe…

i diripiente un gritu:

‘Lanta òfisirnan,

seba eskudonan!’

6Pasobra Señor a bisa mi:

‘Pone un sentinela

i lag'é mèldu tur loke e mira!

7Si e mira garoshinan di guera,

halá pa dos kabai,

i hòmber riba buriku i kamel,

e mester paga tinu, bon tinu.’

8E ora ei e sentinela a grita:

‘Mi Shon, henter dia di Dios mi ta pará

riba mi toren di vigilansia;

nochinan largu mi ta tene warda fielmente.

9I até, awor sí,

ata un hòmber ta bini aya

riba un garoshi di guera,

halá pa dos kabai.

El a anunsiá: “Babilonia a kai! Sí, kai el a kai!

Tur imágen di nan diosnan ta bentá abou,

kibrá na wèrki!” ’

10Mi pueblo,

trapá manera maishi batí riba plenchi,

mi a anunsiá boso loke SEÑOR soberano, Dios di Israel, a bisa mi.

Un profesia kontra Edom

11Dios ta bai baha pisá riba Duma.

Mi ta tende un gritu for di Seír:

‘Guardia, kuantu mas falta pa di dia habri?

Guardia, kuantu mas falta pa di dia habri?’

12I e guardia ta kontestá:

‘Di dia ta habri sigur,

pero awor ainda ta anochi.

Si ta un kontesta bo ke,

anto bini bèk un be mas.’

Profesia kontra Arabia

13Hòmbernan di Dedan,

keda pasa anochi ku boso karavananan

den mondi di Arabia.

14Habitantenan di Tema,

hiba awa pa e dedanitanan, morto di set;

duna e fugitivonan akí di kome,

15pasobra hui nan ta hui pa spada,

p'e spada sunú i p'e bog armá,

pa furia di guera.

16T'esaki Señor a bisa mi: ‘Denter di un aña sin kita sin pone, grandesa di Kedar lo kaba na nada.

17Loke sobra di dje, di su famoso tiradónan di flecha i sòldánan entrená, lo no nifiká gran kos.’ T'asina SEÑOR, Dios di Israel mes, a bisa.