Salmo 74 - Papiamentu Bible 2013(PB13)

SALMO 74SEÑOR, reskatá bo pueblo for di gara di enemiguPoema didáktiko di Asaf.

1O Dios, di kon B'a bandoná nos pa semper,

di kon bo ira ta kima

kontra bo karnénan, bo rebaño?

2Kòrda riba bo komunidat,

ku Bo a gana ántes ayá,

e tribu ku Bo a reskatá

pa el a bira bo mes propiedat;

kòrda riba Seru di Sion,

kaminda Bo tabata biba.

3Bai Bo mira e ruinanan fatal,

henter tèmpel destruí pa enemigu.

4Bo enemigunan a grita viktoria

meimei di bo lugá sagrado.

Aya nan a planta nan banderanan

komo señalnan bon visibel.

5Ta manera nan a zuai nan machete

i a kap den un mondi será;

6tur relieve nan a kibra na wèrki

ku gòlpinan di hacha i mukel.

7Nan a pega bo tèmpel na kandela,

a profaná i basha abou kas di bo nòmber.

8Nan ker a kaba ku nos tur den ún kabá,

tur kas di Dios den pais nan a kima.

9No tin señal di Dios pa nos,

ningun profeta no a keda,

niun di nos no sa te ki dia.

10O Dios, kuantu tempu mas

e opresor ei lo sigui bochorná Bo

Akaso e enemigu por keda

profaná bo nòmber sin fin?

11Di kon Bo no ta saka bo man,

Bo ta skonde bo man drechi tra'i bo lomba?

12Pero, Dios, fo'i prinsipio, Bo ta mi rei

ku ta salba hende rònt mundu.

13Ku bo forsa Bo a sples laman na dos,

Bo a kibra kabes di dragonnan di laman.

14B'a machiká kabesnan di Leviatan

i a dun'é pa kuminda na tribon.

15B'a laga fuente i riu brota.

B'a seka riunan ku semper sa tin awa.

16Dia ta di Bo, anochi ta di Bo,

t'Abo ta Esun ku a duna luna i solo nan lugá.

17Bo a fiha tur frontera di mundu,

tempu di friu i di kalor, ta bo trabou.

18Kòrda bon, SEÑOR, enemigu ta hari Bo,

un pueblo bobo ta ultrahá bo nòmber.

19No laga bo palomba pa falki!

Ni keda sin kòrda nunka mas

bida di bo yunan den mizeria.

20Konsiderá bo Aliansa! Pasobra

tin hopi lugá skur den pais

kaminda ta yen di violensia.

21No laga hende oprimí

bai ku kara brongosá;

pobernan i hende sin derecho

mare nan por alabá bo nòmber!

22Lanta, defendé bo kaso, Dios,

ripará ku hende sin sintí

ta sigui ofendé Bo henter dia.

23No lubidá gritu mahos di bo enemigunan,

e rabiamentu semper mas pisá

di esnan ku ta lanta kontra Bo.