Job 12 - Papiamentu Bible 2013(PB13)

Job ta dirigí su mes na su amigunanJob ta pretendé ku e ta mes sabí ku su amigunan

1E ora ei Job a rospondé:

2‘Ai sí, boso ta, sin duda, e delaster sabionan;

dia boso muri sabiduria a kaba!

3Mi tambe tin sintí, meskos ku boso,

mi no ta inferior na boso.

Akaso boso ta kere,

ku loke boso a bini kuné ta kos nobo?

4Mi a para bira pantomina di mi amigunan,

ami, un hòmber ku sa resa na Dios

i haña kontesta.

Ami, un hòmber hustu, sin mancha,

a para bira pantomina.

5Esnan ku no sa pasa den skual ta pensa:

“Ban pone salu riba su heridanan,

ban dal e hòmber akí bash'abou,

awor ku e ta tambaliá.”

6Hende violento ta gosa di pas i trankilidat,

hende ku ta provoká Dios, ta seif,

ta parse ku nan ta pone Dios hasi loke nan ke.

Dios a duna asta bestia sabiduria

7I ainda boso ta tribi bisa mi:

“Puntra bestia, nan ta siña bo,

puntra para den laria, nan ta bisa bo,

8o papia ku tera i e ta instruí bo,

ku piská den laman i nan ta informá bo.

9Kua di nan no sa

ku ta man di SEÑOR a hasi esaki?

10Bida di tur kriatura

i rosea di henter humanidat

ta den su man.

11Akaso hende no mester averiguá

loke su orea tende,

manera lenga mester kùr loke e pruf?

12Job, serka bieunan tin sabiduria,

komprondementu ta bini ku edat.”

Job sa ku Dios tin poder pa hasi loke Dios ke

13Pero Dios, ku tin sabiduria,

tin poder tambe.

E tin sintí i konosementu.

14Loke Dios destruí,

niun hende no por rekonstruí,

hende ku E pone prezu,

no ta sali liber mas.

15Si Dios wanta áwaseru,

tera ta seka,

si E manda yobida,

e ta inundá tur kos.

16Dios ta fuerte,

semper viktorioso;

kriminal o víktima,

tur ta someté na su poder.

17Konseheronan, E ta pone marcha, tur plumá,

i fo'i huesnan E ta kita kapasidat pa diserní.

18Fo'i kurpa di reinan, E ta kita paña real

i bisti nan lantera di katibu.

19Saserdotenan E ta pone marcha, tur plumá,

i na outoridat establesí E ta pone un fin.

20E ta tapa boka di hende ku pueblo ta konfia;

E ta kita bon huisio for di ansianonan.

21E ta kubri hende altu ku bèrgwensa

i kibra forsa di poderosonan.

22Dios ta revelá profundidatnan skur,

skuridat di graf E ta klara.

23E ta hasi nashonnan grandi

i E mes ta destruí nan;

E ta plama nan

i E mes ta guia nan.

24E ta kita sano huisio for di lidernan di pueblo,

nan ta bruha i pèrdè kaminda.

25Nan ta kana zeilu, manera hende fuma

i nan ta tira man pa fula kon kana den skuridat.