Proverbionan 4 - Papiamentu Bible 2013(PB13)

1Yunan, tende ora tata ke koregí boso;

paga atenshon pa boso haña komprenshon.

2Pasobra loke mi tin pa siña boso ta bon,

no rechasá mi reglanan di bida.

3Tempu mi tabata mucha den kas di mi tata,

yòn i sin eksperensia ainda,

úniko yu di mi mama,

4tata a siña mi bisando:

‘Warda mi palabranan den bo kurason,

kumpli ku mi mandamentunan pa bo biba.

5Kore tras di sabiduria i bringa pa haña komprenshon,

no lubidá mi palabranan ni desviá for di nan.

6No bandoná sabiduria i lo e protegé bo;

stim'é i lo e warda bo.

7Optené sabiduria i atkerí komprenshon,

duna nan bo prioridat.

8Duna sabiduria su balor, e ora ei lo e hasi bo grandi;

ser'é den bo brasa, i lo e hasi bo famoso.

9Lo e ta un korona elegante pa bo kabes,

i un korona di splendor.’

10Mi yu,

skucha i aseptá loke mi bisa,

e ora ei lo bo biba largu.

11Mi ta guia bo den kaminda di sabiduria

i dirigí bo hasi bo pasonan règt.

12Ora di kana lo bo no topa opstákulo,

ora di kore lo bo no trompeká.

13Dal tene na loke a siña bo, no laga lòs,

warda nan, ta di nan bo bida ta dependé.

14No sigui paso di mal hende,

no sigui mal ehèmpel.

15Evitá di pasa kaminda nan ta,

keda leu for di nan i sigui padilanti.

16Ta te ora nan kousa mizeria, nan por drumi trankil.

Nan ta keda lantá, tanten nan no a hasi ningun hende daño.

17Pasobra maldat ta nan kuki,

violensia ta nan shampaña.

18Pero bida di un hende hustu ta manera salida di solo:

ora pa ora e ta bira mas kla,

te ora e yega su punto mas altu.

19Kaminda di mal hende ta manera skuridat;

nan no sa riba kiko nan ta trompeká.

20Mi yu, tende di mi,

duna oido na mi palabranan.

21No pèrdè nan for di bista,

warda nan te den profundo di bo kurason.

22Na esnan ku haña nan,

nan ta duna bida i salú.

23Kuida bo manera di pensa mas ku tur kos ku bo tin na mundu,

pasobra asina bo ta determiná bo bida.

24No bira palabra;

no laga mentira sali for di bo boka.

25Wak semper bo dilanti,

no pèrdè bo meta for di bista.

26Wak kaminda bo ta kana,

ya bo ta kana sigur.

27No desviá kita na man drechi ni na man robes,

tene bo leu for di maldat.