MASALIMO 28 - Buku Lopatulika Bible 2014

Apempha chipulumutso, ayamika populumutsidwaSalimo la Davide.

1 Mas. 83.1 Kwa Inu, Yehova, ndidzafuulira;

thanthwe langa, musandikhalire ngati wosamva;

pakuti ngati munditontholera ine,

ndidzafanana nao iwo akutsikira kumanda.

2 1Maf. 8.22, 28-29 Mverani mau a kupemba kwanga, pamene ndilirira Inu,

pamene ndikweza manja anga kuloza ponenera panu poyera.

3Musandikoke kundichotsa pamodzi ndi oipa,

ndi ochita zopanda pake;

amene alankhula zamtendere ndi anansi ao,

koma mumtima mwao muli choipa.

4 2Tim. 4.14 Muwapatse monga mwa ntchito zao,

ndi monga mwa choipa chochita iwo;

muwapatse monga mwa machitidwe a manja ao;

muwabwezere zoyenera iwo.

5 Yes. 5.12 Pakuti sasamala ntchito za Yehova,

kapena machitidwe a manja ake,

adzawapasula, osawamanganso.

6Wodalitsika Yehova, Pakuti adamva mau a kupemba kwanga.

7 Mas. 3.3 Yehova ndiye mphamvu yanga, ndi chikopa changa;

mtima wanga wakhulupirira Iye, ndipo anandithandiza,

chifukwa chake mtima wanga ukondwera kwakukulu;

ndipo ndidzamyamika nayo nyimbo yanga.

8Yehova ndiye mphamvu yao,

inde mphamvu ya chipulumutso cha wodzozedwa wake.

9 Mas. 78.71 Pulumutsani anthu anu, ndi kudalitsa cholandira chanu;

muwawetenso, ndi kuwanyamula nthawi zonse.