MASALIMO 5 - Buku Lopatulika Bible 2014

Matsoka a oipa, madalitso a olungamaKwa Mkulu wa Nyimbo; aimbire zitoliro. Salimo la Davide.

1Mverani mau anga, Yehova, Zindikirani kulingirira kwanga.

2Tamvetsani mau a kufuula kwanga,

Mfumu yanga, ndi Mulungu wanga;

pakuti kwa Inu ndimapemphera.

3 Mas. 88.13 M'mawa, Yehova, mudzamva mau anga;

m'mawa, ndidzakukonzerani pemphero langa, ndipo ndidzadikira.

4Pakuti Inu sindinu Mulungu wakukondwera nacho choipa

mphulupulu siikhala ndi Inu.

5 Hab. 1.13 Opusa sadzakhazikika pamaso panu,

mudana nao onse akuchita zopanda pake.

6 Mas. 55.23 Mudzaononga iwo akunena bodza;

munthu wokhetsa mwazi ndi wachinyengo,

Yehova anyansidwa naye.

7 1Maf. 8.29-30 Koma ine, mwa kuchuluka kwa chifundo chanu

ndidzalowa m'nyumba yanu;

ndidzagwada kuyang'ana Kachisi wanu woyera ndi kuopa Inu.

8 Mas. 25.5 Yehova, munditsogolere m'chilungamo chanu,

chifukwa cha akundizondawo;

mulungamitse njira yanu pamaso panga.

9 Mas. 62.4; Aro. 3.13 Pakuti m'kamwa mwao mulibe mau okhazikika;

m'kati mwao m'mosakaza;

m'mero mwao ndi manda apululu;

lilime lao asyasyalika nalo.

10 2Sam. 15.31 Muwayese otsutsika Mulungu;

agwe nao uphungu wao.

M'kuchuluka kwa zolakwa zao muwapirikitse;

pakuti anapikisana ndi Inu.

11 Yes. 65.13 Koma akondwere onse amene athawira kwa Inu,

afuule mokondwera kosaleka, popeza muwafungatira;

nasekere mwa Inu iwo akukonda dzina lanu.

12Pakuti Inu, Yehova, mudzadalitsa wolungamayo;

mudzamtchinjiriza nacho chivomerezo ngati chikopa.