1Wawqi panikuna, Señor Jesucristo kutimur shuntamänantsipaq kashqanta shumaq tantiyakärinaykitami munapäkü.1Tes. 4.15-17.
2Noqakuna mayapäkushqä qamkuna kaqcho lutan yachatsikuqkuna kayno nir yachatsipäkushushqaykitami: <
Tsay runakunaqa nirkaykan tsayno yachatsipäkunanpaq Espíritu Santu revelashqanta. Tsaynöpis nirkaykan kikï tsayno nishqäta y cartächöpis tsayno yachatsishqäta. Tsayno nipäkushuptikipis ama criyipäkuytsu.
3Imata nishuptikipis ama chaskipäkuytsu. Jesucristo kutimunanpaqqa puntata atska runakunami Tayta Diospa contran sharkapäkunqa. Tsaynöpis anticristuraqmi yurimunqa. Paytami Tayta Dios infiernuman qaykunqa.
4Anticristuqa manami munanqatsu Tayta Diosta ni imatapis runakuna adorapäkunanta, sinöqa kikinta adoranantami munanqa. Tsaynöpis payta adorapäkunanpaqmi Dios tukushpan Tayta Diospa templunman yaykuykur jamakunqa.Dan. 11.36; Eze. 28.2.
5¿Manaku yarpapäkunki tsayno kananpaq kashqanta mayna wilashqäta?
6Kanan qamkuna musyankimi anticristo manaraq yurimunanpaq ima tsaparaykashqantapis. Tsayno tsaparanqa tiempu cumplishqanyaqmi.
7Manaraq shamuptinpis Satanásqa maynami runakunata mana tantiyakayla engañaykan Tayta Diosta mana cäsukärinanpaq. Tsaparaykashqanta Tayta Dios jorquriptinnami anticristo yurimunqa.
8Paytami Señor Jesucristo chipchipyaykar kutimur juk pükayla ushakätsinqa.
9Jesucristo manaraq kutimuptinmi Satanáspa munayninwan anticristo tukuy niraq milagrukunata ruranqa.Mat. 24.24.
10Tsaynöpami infiernuman qaykushqa kananpaq destinashqa kaqkunata engañanqa. Paykunaqa Jesucristupa wilakuyninta mana chaskikurmi salvakärinqatsu.
11Mana chaskikärishqanpitami Tayta Dios paykunata pantakätsinqa anticristuta chaskikärinanpaq.
12Tsaynöpami Tayta Diosta mana cäsukur jutsa ruraqkuna lapanpis infiernucho nakapäkunqa.
Salvashqa kanantsipaq Tayta Dios akramashqantsi13Wawqi panikuna, qamkunataqa Tayta Diosmi kuyashushpayki qalaykunanpita akrashushqanki salvashunaykipaq. Kananqa Jesucristupa wilakuyninta chaskikur payman yärakäriptiki y Diospa makincho kawapäkunaykipaq Espíritu Santu yanapashuptikimi salvakärishqanki. Tsaypitami Tayta Diosta imaypis agradëcikurkaykä.
14Paymi qayashushqanki ali wilakuyninta wilapaptï salvashqa kanaykipaq. Tsaymi Señor Jesucristo chipchipyaykar kutimur pushakushuptiki qamkunapis nawpancho kushishqa kawapäkunkipaq.
15Wawqi panikuna, tsayno kananpaq kaykaptinqa Tayta Diosman shumaq yärakur ama qonqapäkuytsu cartawanpis y shimipapis yätsishqäkunata.1Cor. 11.2.
16Kikin Señor Jesucristo y kuyamaqnintsi, imaypis shakyätsimaqnintsi y nawpanman pushamaqnintsi Papänintsi Tayta Dios
17yanapaykuläshunki mana lakikärinaykipaq, pïmaytapis ali shimilaykipa parlapänaykipaq y ali kaqkunata rurapäkunaykipaq.
Who We AreWhat We EelieveWhat We Do
2025 by iamachristian.org,Inc All rights reserved.
