1Alilata ruraq kashqanpita Tayta Diosta agradëcikäriy.
Kuyapäkuyninqa manami imaypis ushakantsu.
2Salvashqa kaqkuna, Tayta Dios salvashqanta wilakäritsun.
Chikiqninkunapa makinpita jorqushqanta wilakäritsun.
3Norti kaq lädupitapis, sur kaq lädupitapis, inti jeqamunan kaq lädupitapis y inti jeqanan kaq lädupitapis Tayta Dios shuntamushqankuna payta alabapäkutsun.
4Wakinkunaqa markaman aywaq nänita mana tarirmi chunyaq jirkapa oqrakashqa puripäkurqan.
5Fiyupa yarqanar y yakunarmi pasaypa almatakashqa karkaykarqan.
6Lakikur Tayta Diosta manakäriptinmi nakarkaykaqta jorqamurqan.
7Paymi ali nänipa pushar tänanpaq kaykaq markaman chayatsirqan.
8¡Kuyapäkuq kashqanpita Tayta Diosta agradëcikäritsun!
¡Noqantsi rayku espantaypaq kaqkunata rurashqanpita agradëcikäritsun!
9Paymi pasaypa yakunaqkunata yakuta kamaripan.
Pasaypa yarqanaqkunata mikuyta kamaripan.
10Wakinkunaqa pasaypa lakikurmi kawapäkurqan.
Carcilcho wataraykaqnömi karkaykarqan.
11Tsayno karqan poderniyuq Tayta Dios nishqankunata mana cäsukushqanpitami.
Paykunaqa Tayta Dios yätsishqankunata manami chaskikärirqantsu.
12Tsaymi Tayta Dios churarqan nakar arupäkunanpaq.
Mayjina nakapäkuptinpis manami pipis yanaparqantsu.
13Lakikur Tayta Diosta manakäriptinmi nakarkaykashqanpita salvarqan.
14Paymi jorqamurqan wanushqano y wataraykaqno karkaykaqta.
15¡Kuyapäkuq kashqanpita Tayta Diosta agradëcikäritsun!
¡Noqantsi rayku espantaypaq kaqkunata rurashqanpita agradëcikäritsun!
16Paymi bronci punkukunatapis pakir usharqan.
Fiërru trancakunatapis pakirmi usharqan.
17Wakinkunaqa mana cäsukuq kashqanpitami pasaypa nakapäkurqan.
18Mikuytapis shonqun pasaypami melanarqan.
Wanuy wanuytanami rikchakärirqan.
19Lakikur Tayta Diosta manakäriptinmi nakarkaykaqta jorqamurqan.
20Tayta Dios nimuptinmi paykuna aliyarqan.
Wanunanpaq karkaykaptinmi aliyätsirqan.
21¡Kuyapäkuq kashqanpita Tayta Diosta agradëcikäritsun!
¡Noqantsi rayku espantaypaq kaqkunata rurashqanpita agradëcikäritsun!
22Tayta Diosta agradëcikur sacrificiuta rupatsitsun.
Alikunata rurashqanpita kushishqa wilakäritsun.
23Wakinkunaqa juk lädu nacionkunapami negociunkunata büquiwan apapäkuq.
24Lamar chawpincho kaykarmi Tayta Dios espantaypaq rurashqankunata rikapäkurqan.
25Tayta Dios mandaptinmi fiyupa löcu wayra qalaykurqan.
Lamarpis altutaraqmi sharkurqan.
26Altuyaq lamar pulchaqyaptinmi büquikunapis talpukänanpaqna kaykarqan.
Kawananpaq kashqantapis manami yarpapäkurqannatsu.
27Shinkashqano karmi ichiytapis ni puriytapis mana kamäpakurqantsu.
Manijayta yachaq kashqanpis manakaqlapaqmi karqan.
28Lakikur Tayta Diosta manakäriptinmi nakarkaykashqanpita salvarqan.
29Löcu wayratapis walwalyaylamanna Tayta Dios tikratsiptinmi yakupis pulchaqyarqannatsu.
30Yaku chawaqta rikarmi kushikärirqan.
Nirkurnami büquikuna chayakunanman Tayta Dios chayatsirqan.
31¡Kuyapäkuq kashqanpita Tayta Diosta agradëcikäritsun!
¡Noqantsi rayku espantaypaq kaqkunata rurashqanpita agradëcikäritsun!
32¡Yärakuq mayinkunawan juntakaykur alabapäkutsun!
¡Mayor runakuna juntakashqanchöpis alabapäkutsun!
33Tayta Diosmi mayukunatapis y pukyukunatapis tsakitsin.
34Runakuna jutsata ruraptinmi ali chakrakunatapis qarayätsin.
35Chunyaq jirkakunatapis oqumanmi tikratsin.
Tsaki chakrakunachöpis pukyukunatami pashtatsin.
36Markankunata sharkatsinanpaqmi tsay chakrakunaman waktsakunata churan.
37Chakrata kicharkurnami üvata plantapäkun.
Cosecharpis atskatami shuntapäkun.
38Tayta Diospa bendicionninwanmi atskaq karkaykan.
Uywankunapis atskamanmi mirarkaykan.
39Contrankuna paykunata wanutsir walkayätsiptinmi
40tsay wanutsiqninkunata Tayta Dios castigan.
Castigaptinmi tsay contrankunaqa chunyaq jirkapa pantakashqa puripäkun.
41Waktsakunatami itsanqa mana lakikärinanpaq Tayta Dios yanapan.
Paykunapa tsurinkunapis atskaman mirananpaqmi bendicionninta churan.
Uysha atskaman mirashqannömi paykunapis atskaman miran.
42Bendicionninta churashqanta rikarmi ali runakuna kushikärin.
Fiyu runakunami itsanqa ima niytapis mana kamäpakuntsu.
43Pipis tantiyakuq karqa tsaykunata tantiyakutsun.
Tsaynöpami cuentata qokunqa Tayta Dios kuyakuq kashqanta.
Who We AreWhat We EelieveWhat We Do
2025 by iamachristian.org,Inc All rights reserved.
