Romanos 16 - Quechua Margos-Yarowilca-Lauricocha Bible（qvm）

Pablo salüdunta apatsishqan

1Panintsi Febimi watukushuqniki shamunqa. Payqa Cencrea iglesiacho diacunïsami kaykan.

2Paymi yärakuq mayintsikunata shumaq yanapan. Tsaynölami noqatapis wilakur puriptï yanapaman. Jesucristuman yärakuq mayintsi kaykaptinqa chaskiykulanki y lapan nistashqankunata kamaripaykulanki.

3Priscilata y Aquilata salüdüta qoykulanki. Paykunami Jesucristupa wilakuyninta wilakur puriptï ali yanapamashqa.Hech. 18.2.

4Paykunaqa wanuytapis mana mantsakuypami yanapamashqa. Tsayno yanapamashqanpitami noqapis y lapan mana Israel wawqi panikunapis agradëcikärï.

5Wayincho juntakaq yärakuq mayintsikunatapis salüdüta qoykulanki.

Tsaynöpis salüdüta qoykulanki kuyanakushqä Epenetuta. Paymi Asia provinciacho lapanpita mas puntata Jesucristuta chaskikushqa.

6Panintsi Maríatapis salüdüta qoykulanki. Paymi qamkunata ali yanapashushqanki.

7Tsaynöpis salüdüta qoykulanki Israel mayïkuna Andrónicuta y Juniastapis. Paykunawanmi carcilcho wichqararqä. Paykunaqa noqapita mas puntatami Jesucristuta chaskikärishqa. Lapan apóstol mayïkunapis paykunata kuyapäkunmi.

8Tsaynöpis salüdüta qoykulanki kuyanakushqä Ampliasta,

9wilakuq mayï Urbanuta y kuyanakushqä Estaquista.

10Tsaynöla salüdüta qoykulanki Apelesta. Jesucristupa ali sirviqnin kaptinmi payta lapan yärakuq mayintsikuna respitapäkun. Tsaynöpis salüdüta qoykulanki Aristóbulupa aylunkunata,

11Israel mayï Herodiónta y Narcisupa ayluncho Jesucristuman yärakuqkunata.

12Tsaynöla salüdüta qoykulanki Trifenatawan Trifosata. Tsay warmikunami Jesucristupa wilakuyninta wilakuqkunata ali yanaparkaykan. Tsaynöla salüdüta qoykulanki panintsi Pérsidata. Paypis Jesucristupa wilakuyninta wilakuqkunata alimi yanapaykan.

13Tsaynöla salüdüta qoykulanki kuyay wawqintsi RufutaMar. 15.21. y mamantapis. Payqa mamänömi ali rikamashqa.

14Tsaynöla salüdüta qoykulanki Asíncrituta, Flegontita, Hermesta, Patrobasta, Hermasta y paykunawan juntakaq wawqi panikunatapis.

15Tsaynöla salüdüta qoykulanki Filóloguta, Juliata, Nereuta, Nereupa paninta, Olimpasta y paykunawan juntakaq wawqi panikunatapis.

16Jukniki juknikipis qaqlaykikunacho mutsanakushpayki winchinakäriy. Purishqä markakunacho kaykaq wawqi panikunapis salüdunta qamkunapaq apatsikamun.

17Wawqi panikuna, pipis chikinakunaykipaq o Jesucristupa wilakuyninta mana cäsupänaykipaq shimita jatipäshuptikipis ama chaskipaytsu. Shimita jatipaqkunaqa lutantami yachatsipäkushunki. Tsayno kaqkunapitaqa witikärinki.

18Paykuna manami Jesucristo alabashqa kananta munartsu yachatsipäkun, sinöqa kikinkuna alabashqa kayta munalarmi. Paykunaqa ali shimilanpami mana tantiyakuq wawqi panikunata lutanta criyiykätsin.

19Tayta Diosta cäsukärishqaykitaqa maytsaychöpis yärakuq mayintsikuna musyanmi. Tsayno kapäkushqaykita musyar noqapis kushikümi. Noqa munä jutsata mana ruraypa alilata rurar imaypis kawapäkunaykitami.Mat. 10.16.

20Ali kawayta qomaqnintsi Tayta Dios yanapaykuläshunki Satanásta manakaqman churapäkunaykipaq. Señornintsi Jesucristo kuyapäshushpayki imaypis yanapaykuläshunki.

21Yanapamaq wawqintsi TimoteupisHech. 16.1. qamkunapaq salüdunta apatsikamunmi. Tsaynölami Israel mayïkuna Lucio, Jasón y Sosípaterpis salüdunta qamkunapaq apatsikamun.

22(Noqa Terciupis Señornintsipa jutincho salüdüta qamkunapaq apatsikamü. Apóstol Pablo dictamashqannölami kay cartata qelqaykämü.)

23Tsaynölami GayupisHech. 19.29; 1Cor. 1.14. salüdunta apatsikamun. Paymi wayinta kamaripämashqa patsakunäpaq y yärakuq mayintsikunawan tsaycho juntakänäpaq. Tsaynölami kay markapa tesorërun Erastupis2Tim. 4.20. y wawqintsi Cuartupis qamkunapaq salüdunta apatsikamun.

24[Señornintsi Jesucristo kuyapäshushpayki imaypis yanapaykuläshunki. Amén.]

Carta ushanan

25¡Tayta Diosta alabaykulay! Paymi Jesucristupa wilakuyninta wilakushqänöla yanapaykäshunki payman yärakur munashqanno kawapäkunaykipaq. Tsay wilakuytaqa runakuna nawpata manami musyarqantsu.

26Kananmi itsanqa profëtakuna qelqashqannöla y imayyaqpis kawaq Tayta Dios nishqannöla wilakuyninta maytsay nacionkunachöpis wilakurkaykan. Tsayno wilakurkaykan pïmaypis Jesucristuman yärakur Tayta Dios munashqanno kawapäkunanpaqmi.

27¡Jesucristupa jutincho Tayta Diosta imaypis alabaykuläshun! ¡Pay japalanmi Dios kaykan! ¡Manami pipis payno yachaq kantsu! Amén.