2 Samuel 8 - Quechua Margos-Yarowilca-Lauricocha Bible（qvm）

Contrankunata David vincishqan 1 Crónicas 18.1-13

1Tsaypitanami filisteo runakunata vincirkur Meteg-ama markata paykunapita David qechurqan.

2Tsaynölami Moab nación runakunatapis soldädunkunawan vincirqan. Nirkurmi moabita runakunata pampaman lätaykatsir jatun cordilwan tupurqan. Ishkay tupuyta tupurkurmi tsaycho lätaraykaq runakunataqa lapanta wanutsirqan. Tsaypita juk tupuyta tupurkurmi tsaycho lätaraykaq runakunata kawaykaqta kachaykurqan. Mana wanutsishqan kaqkunami Davidpa munaynincho kashpan impuestuta imaypis pägapäkurqan.

3Tsaynölami soldädunkunawan David vincirqan Rehobpa tsurin Hadad-ezertapis. Payqa Soba nacionpa mandaqnin reymi karqan. Tsayno vincirqan Éufrates mayu nawpancho kaykaq markakunata Hadad-ezer shuntaq aywaptinmi.

4Paykuna kaqpitami David prësu tsaritsimurqan juk waranqa qanchis pachak (1,700) cawallun muntashqa soldädukunata y ishkay chunka waranqa (20,000) chakilapa puriq soldädukunata. Pachak (100) carrëtata tsutananpaq cawallukunatapis shuntarqan. Wakin kaq cawallukunatanami itsanqa ankunkunata kutsur usharqan.

5Davidwan pelyaptinmi Soba nacionpa mandaqnin rey Hadad-ezerta yanapananpaq Siria nacionpita soldädukuna chayarqan. Jina kaqtami paykunatapis ishkay chunka ishkay waranqa (22,000) soldädukunata wanutsipäkurqan.

6Nirkurnami Davidqa Siria nación runakunata impuestuta pägatsinanpaq Damascuman soldädunkunata churarqan. Tsaynölami maypa aywaptinpis Davidta Tayta Dios yanaparqan contrankunata vincinanpaq.

7Hadad-ezerta vincirkurmi soldädunkunapa capitanninkuna puritsishqan qori escüdunkunata shuntarkur Jerusalénman David apatsirqan.

8Tsaynölami Beta y Berotai markakunapita tsaytsika broncitapis apatsirqan. Beta y Berotai markakunaqa Hadad-ezerpa munayninchömi karqan.

9Tsaypitanami Hamat markapa mandaqnin rey Toi mayarqan Hadad-ezerpa soldädunkunata David vincishqanta.

10Toiqa Hadad-ezerwan contra contrami rikanakurqan. Tsaymi kushikushpan tsurin Joramta kacharqan Davidta felicitananpaq. Qoripita, qellaypita y broncipita rurashqa tukuy niraq qarakuykunata qaraptinmi

11Tayta Diospaq David churarqan. Tsaynöpis churarqan lapan vincishqan nacionkunapita shuntashqan qorita, yoraq qellayta y broncita.

12Tsay shuntashqankuna karqan edomita runakunapita, moabita runakunapita, amonita runakunapita, filisteo runakunapita, amalecita runakunapita y Soba nacionpa mandaqnin rey Hadad-ezerpitami.

13Tsaynöpami David maytsay nacionchöpis reqishqa karqan. Siria nacionta vincirkur soldädunkunawan Jerusalénman kutirmi Kachi Pampa nishqancho chunka pusaq waranqa (18,000) edomita runakunata wanutsipäkurqan.Sal. 60.

14Nirkurnami intëru Edom markakunacho soldädunkunata David churarqan tsaycho taqkuna paypa munaynincho kananpaq. Davidtami Tayta Dios yanaparqan maychöpis pelyar vincinanpaq.

Davidpa soldädunkunapa capitanninkuna pï pï kashqanpis 2 Samuel 20.23-26; 1 Crónicas 18.14-17

15Israel runakunapa mandaqnin rey kar lapanta David alimi mandarqan y pitapis alimi juzgarqan.

16Soldädunkunapa capitanninmi karqan Sarviapa wawan Joab. Ahiludpa tsurin Josafatmi karqan Israelcho ima pasashqankunatapis qelqaq.

17Cürakunami karqan Ahitobpa tsurin Sadoc y Abiatarpa tsurin Ahimelec. Davidpa secretariunmi karqan Seraías.

18Tsaynöpis Joiadapa tsurin Benaía karqan cereteo soldädukunapa y peleteo soldädukunapa capitanninmi. Davidpa tsurinkunaqa cürakunami karqan.