1¡Aleluya!
Jana patsacho kaqkuna, Tayta Diosta alabapäkuy.
2 Angilkuna, lapayki alabapäkuy.
Guërracho pelyaq angilkuna, lapayki alabapäkuy.
3Intipis y killapis, alabapäkuy.
Atsikyaq qoylarkuna, lapayki alabapäkuy.
4Mas altucho kaq ciëlupis, payta alabay.
Ciëlu janancho kaykaq yakupis, payta alabay.
5 Tayta Dios alabashqa kaykulätsun.
Pay niptilanmi lapanpis rurakarqan.
6Tayta Dios kamashqankunaqa manami ushakanqatsu.
Pay nishqankunataqa manami pipis trukatsinqatsu.
7Kay patsacho kaqkuna, Tayta Diosta alabapäkuy.
Lamarcho mantsariypaq pescädukuna y tsaycho lapan kaqkunapis, alabapäkuy.
8Räyupis, runtu tamyapis, rashtapis y pukutaypis, alabapäkuy.
Tayta Dios munashqanta ruraq löcu wayrapis, alabay.
9Puntakunapis, jirkakunapis, wayuq yörakunapis y cedrukunapis, alabapäkuy.
10Manshu uywakunapis, chucaru uywakunapis, lätaypa puriqkunapis y pishqukunapis, alabapäkuy.
11Kay patsacho reykunapis, lapan nacioncho taq runakunapis, munayniyuq runakunapis y autoridäkunapis, alabapäkuy.
12Mözukunapis, jipashkunapis, awkinkunapis, wamrakunapis,
13Tayta Diosta alabapäkuy.
Paymanqa manami pipis tinkuntsu.
Kay patsacho kaqkunapitapis y jana patsacho kaqkunapitapis mas munayniyuqmi kaykan.
14Paymi kuyashqan runakunata imaypis yanapan.
Pay munashqanno kawaq Israel runakuna, lapayki alabaykulay.
¡Aleluya!
Who We AreWhat We EelieveWhat We Do
2025 by iamachristian.org,Inc All rights reserved.
