1 1 (1b) Tayta Diostami lapan shonqüwan alabashaq.
Lapan voluntänïwanmi santu jutinta joqarir agradëcikushaq.
2 Tayta Diostami lapan shonqüwan alabashaq.
Kuyapämar yanapamashqanta manami imaypis qonqashaqtsu.
3Paymi lapan jutsäta perdonaman.
Tukuy niraq qeshyapitapis aliyätsiman.
4Wanuypitapis paymi salvaman.
Kuyapämashpanmi yanapaman.
5Alinnin kaqkunatami kamaripäman.
Ankano mana utikaq kanäpaqmi mözuyätsiman.
6Waktsakunata makitsakuptin Tayta Diosmi favornin sharkun.
7Imano kawanantsipaqpis Moiséstami musyatsirqan.
Rurashqankunatami Israel runakunata tantiyatsirqan.
8 Tayta Diosqa ali shonqumi y kuyapäkuqmi kaykan.
Kuyakuq karmi juklaqa mana rabyakuntsu.
9Manami yaparir yaparirtsu castigamantsi.
Manami imayyaqpis nanaparämäshuntsu.
10Manami jutsata rurashqantsiman tuputsu castigamantsi.
11Kay patsapita jana patsayaq altu kashqannömi payta mantsakuqkunapaqqa kuyakuynin jatun kaykan.
12Patsapa juk kuchunpita jukaq kuchunyaq jitariqnömi jutsa rurashqantsitapis karuman jitarishqa.
13Tsurinta taytan kuyashqannömi payta mantsakuqkunataqa kuyan.
14Payqa musyanmi imano kashqantsitapis.
Alpalapita kashqantsita musyanmi.
15Runakunaqa qewano ushakaqlami karkaykan.
Waytano shushuqlami karkaykan.
16Akaq wayra shamur jachata ushakätsinmi.
Ushakätsiptinmi maycho kashqanpis mana musyakannatsu.
17 Tayta Diospa kuyakuyninmi itsanqa mana ushakaq kaykan.
Payta mantsakuqkunataqa imaypis kuyanmi.
Paykunapa tsurinkunapaq y wilkankunapaqpis alikunalatami ruran.
18Tsaynölami yanapan rurashqan pactuta cumpliqkunata y mandamientunkunata cäsukuqkunata.
19Jana patsachömi Tayta Diospa trönun kaykan.
Tsaypitami lapan kay patsacho kaqkunata mandaykämun.
20Munayniyuq angilkuna, Tayta Diosta alabapäkuy.
Nishqanta cäsukuq kar payta alabapäkuy.
21 Tayta Diosta sirviq y munashqanta ruraq angilkuna, payta alabapäkuy.
22Lapan kamashqankuna, maytsaychöpis payta alabapäkuy.
Paytami lapan shonqüwan noqapis alabashaq.
Who We AreWhat We EelieveWhat We Do
2025 by iamachristian.org,Inc All rights reserved.
