1 Tayta Dios, ima pasamashqantapis rikaykarqa kuyapaykalämay.
Kayjinanpa desgracia pasaykämaptinqa yanapaykalämay.
2Chakräkunatapis juk lädu nación runakunami mururkaykan.
Wayïkunachöpis jäpa runakunami tarkaykan.
3Noqakunaqa taytaynaq waktsa wamrakunanömi karkaykä.
Noqakunapa mamäpis ayluynaq viüdanömi rikakärishqa.
4Kananqa kikïkunapa yakütapis upunäpaq rantïraqmi.
Kikïkunapa yantäkunatapis pägaykurraqmi yantakärï.
5Conträkunapis apta aptami qatikacharkaykäman.
Mayjina utikashqa karpis manami jamayta taripäkütsu.
6Egipto runakunata y Asiria runakunataraqmi mikuyta kamaripämänanpaq ruwakärï.
7Unay aylükunaqa jutsata rurarpis castïguta manaraq chaskirmi wanupäkushqa.
Paykunapa jutsankunapitami noqakuna castïguta chaskirkaykä.
8Kananqa ashmay runakunapa makinchömi karkaykä.
Paykunapa makinpita jorqamänanpaq manami pipis kantsu.
9Chunyaq partikunapita mikuykunata apamurpis asaltantikunapa makinpita wanuy kawaymi qeshpipäkamü.
10Pasaypa mikanarmi warishqa hornucho rupatsishqano qaräkunapis yanayashqa kaykan.
11 Sióncho warmikunata y Judá markakunacho jipashkunatapis tsaripakushqami.
12Mandamaqnïkunatapis makipita watarkurmi warkapäkushqa.
Mayor runakunatapis manami respitapäkushqatsu.
13Mas kalpayuq runakunatami apapäkushqa mulinu rumita tumatsinanpaq.
Mözukunatami yantata aparipashqa apaytapis mana puëdishqanyaq.
14Mayor runakunapis marka punkucho manami jamarannatsu.
Mözukuna y jipashkunapis manami cantannatsu.
15Kushikuytapis manami taripäkünatsu.
Kushikur qatswanäpa trukan wanupakushqano pasaypa lakikuylachömi kawarkaykä.
16Noqakunapa umäpita corönäkuna ishkiqnömi munayniyuq kashqäkunapis ushakashqa.
¡Kananchi kananlaqa!
Pasaypa jutsayuq kashqäpitami kayno nakarkaykä.
17Lakikuylawannami shonqüpis fiyupa nanaykan.
Waqaylawannami nawïpis tsakarpunna.
18Sión jirkan pasaypa chunyaraptinmi munti uywakunalana tsaycho purirkaykan.
19 Tayta Dios, ima pasaptinpis qammi itsanqa imayyaqpis mandamaqnï rey kaykanki.
Jana patsapita patsami imayyaqpis mandaykämunki.
20¿Imanirtaq pasaypa qonqaykamashqanki?
¿Imanirtaq kaytsika unay kachariykamashqanki?
21 Tayta Dios, noqakunata perdonaykalämay.
Perdonamaptikiqa qamlamannami yärakärimushaq.
Kamakaykatsilay unay kawashqäno yapay kushishqa kawapäkunäpaq.
22¿Imanirtaq rikaytapis mana munamankinatsu?
¿Fiyupaku noqakunapita rabyashqa kaykanki?
Who We AreWhat We EelieveWhat We Do
2025 by iamachristian.org,Inc All rights reserved.
