Proverbios 14 - Quechua Margos-Yarowilca-Lauricocha Bible（qvm）

1Tantiyakuq warmiqa wayincho taqkuna ali kawananpaqmi imatapis alikunata ruran.

Mana tantiyakuq warmimi itsanqa wayincho taqkunata jaqayätsin.

2Cäsukuq runaqa Tayta Diosta mantsakunmi.

Mana cäsukuq runami itsanqa manakaqman churan.

3Mana tantiyakuq runaqa runa tukurmi imatapis riman.

Tantiyakuq runami itsanqa imatapis alilata riman.

4Töru mana kaptinqa mikuy churakunapis jäkunmi.

Töru kaptinmi itsanqa putsuy putsuy mikuy kaykan.

5Mana lulakuq testïguqa rasun kaqlatami riman.

Rantiy testïguqa lulakurpis rasun kaqtanöran riman.

6Lïsu runaqa tantiyakuq kayta munarpis manami kamäpakuntsu.

Respitakuq runami itsanqa shumaq tantiyakun.

7Fiyu runawan juntakarqa manami imatapis alita yachakunkitsu.

Paywan juntakänaykipa trukanqa witikuy.

8Tantiyakuq runaqa jutsata rurarpis perdontami manakun.

Mana tantiyakuq runami itsanqa jutsata rurashqantapis mana tantiyakuntsu.

9Mana tantiyakuq runaqa jutsata rurarpis kushikunmi.

Tantiyakuq runami itsanqa jutsata rurarpis Tayta Diosta perdonta manakun.

10Kikilanmi runa musyan shonqun lakishqa kaykashqanta.

Manami jukpa shonqun kushishqa kaykashqanta pipis musyantsu.

11Fiyu runapaqa wayincho taqkuna wakpa kaypami aywakärin.

Ali runapa wayinchömi itsanqa yanapanakur ali kawapäkun.

12Wakin runaqa lutanta rurarpis alita ruraykashqantami yarpan.

Tsaynöla kawarqa wanuymanmi chayanqa.

13Asikurpis wakinqa shonquncho lakishqami kaykan.

Tsaymi kushishqa kaykashqanchöpis waqayman churakan.

14Fiyu runaqa lutanta rurarpis kushikunmi.

Ali runami itsanqa alita rurashqanpita kushikun.

15Mana tantiyakuq runaqa pï nishqantapis juklami criyin.

Tantiyakuq runami itsanqa lutalaqa pitapis mana criyintsu.

16Tantiyakuq runaqa Tayta Diosta mantsakurmi jutsa rurayta kacharin.

Mana tantiyakuq runami itsanqa mana mantsakuypa jutsata ruran.

17Imalapitapis rabyakuq runaqa lutantami ruran.

Tantiyakuq runami itsanqa ashliptinpis upälakun.

18Mana tantiyakuq runaqa imaypis lutan ruraylachömi kawan.

Shumaq tantiyakuq runaqa mas yachaqmi rikakun.

19Lutanta rurashqanta tantiyakurmi fiyu runapis ali runakunapa makinta mutsanqa.

Ima ruraytapis mana kamäpakurmi nawpanman qonqurpakunqa.

20Waktsa runataqa imanpis mana kaptinmi kuyanakushqan amïgunpis ajayan.

Rïcu runatami itsanqa riquëzanpaq kashqa pïmaypis kuyan.

21Runa mayinta manakaqman churaq kaqqa jutsayuqmi rikakun.

Waktsakunata yanapaq runataqa Tayta Diosmi yanapan.

22Lutanta rurananpaq yarpachakuq runaqa mana alimi kawan.

Alita rurananpaq yarpachakuq runatami itsanqa pipis kuyar yanapan.

23Arukuq runapaqa imaykanpis kanmi.

Parlalar ichiräkuq runaqa waktsayanmi.

24Tantiyakuq runakunapaqa yachaq kayninmi corönan kaykan.

Mana tantiyakuq runakunapami itsanqa upa kaynilan corönan kaykan.

25Rasun kaqlata rimaq testïguqa pitapis salvanmi.

Rantiy testïgumi itsanqa pitapis wanuyman churan.

26Payta mantsakuq kaqtaqa kikintapis y wamrankunatapis Tayta Dios yanapanmi.

27 Tayta Diosta mantsakuq runaqa ali kawaytami tarin.

Tsaynöpami wanuypitapis qeshpin.

28Mandashqan nacioncho atska runakuna kaptinqa rey kushikunmi.

Walkala runa kaptinmi itsanqa lakikun.

29Tantiyakuq runaqa jukla manami rabyakuntsu.

Mana tantiyakuq runami itsanqa imalapitapis rabyakun.

30Ali shonqu runaqa sänumi kawan.

Chiki runami itsanqa qeshyalata mitsikun.

31Waktsata nakatsiq runaqa kamakuq Tayta Diostami rabyanätsinmi.

Waktsata yanapaq runaqa Tayta Dios nishqantami wiyakun.

32Fiyu runaqa lutankunata rurashqanpita mana alimi kawan.

Ali runami itsanqa alita rurashqanpita jawka kawan.

33Yarpachakuq runaqa shumaqmi tantiyakun.

Mana yarpachakuq runami itsanqa mana tantiyakuntsu.

34Nacioncho ali rikanakurqa pïmaypis kushikunmi.

Jutsata rurar kawaptinqa tsay nacionta manakaqmanmi churapäkun.

35Ashmaynin cäsukuq kaptinqa rey kuyanmi.

Mana cäsukuptinmi itsanqa rabyakun.