1Wawqi panikuna, Señor Jesucristupa jutinchömi qamkunata ruwakü yachatsishqänöla Tayta Dios munashqanno imaypis kawapäkunaykipaq. Pay munashqanno kawashqaykita musyarpis waran waran tsaynöla kawapäkunaykipaqmi shakyaykätsï.
2Musyapäkunkimi Señor Jesucristupa wilakuqninkuna kar imata yachatsipäkushqätapis.
3Jutsaynaq kawanaykita munarmi Tayta Dios mana munantsu fornicación jutsata rurapäkunaykita,
4sinöqa majaykiwan respitanakur ali kawapäkunaykitami munan.
5Tsaynöpis manami munantsu Jesucristuta mana chaskikuq runakunano shanaripakur jukwan jukwan purikärinaykita.
6Tsayno kaptinqa ama mayqaykikunapis jukpa warminwan purikäriytsu. Tsayno purikurqa runa mayikitami engañaykanki. Wilapäkushqänami tsayno kaqkunataqa Señor Jesucristo mana kuyapaypa castigananpaq kashqanta.
7Manami jutsata rurar purikunantsipaqtsu Tayta Dios akramashqantsi, sinöqa pay munashqanno kawanantsipaqmi.
8Kay yachatsishqäkunata pipis mana chaskikurqa manami noqakunatatsu manakaqman churaykäman, sinöqa Espíritu Santuta qomaqnintsi Tayta Diostami.
9Jukniki juknikipis kuyanakur ali kawanaykipaqmi Tayta Dios tantiyatsipäkushushqanki. Tsaymi mana nistapäkunkitsu kuyanakunaykipaq tantiyatsinäta.
10Macedonia provinciacho taq lapan wawqi panikunawan alishi kuyanakurkaykanki. Tsayno kaptinpis qamkunata shakyätsipäkamü masraq kuyanakunaykipaqmi.
11Piwanpis mana rimanakuylapa kawapäkuy. Runa mayiki imano kawashqantapis rikapar ama purikäriytsu. Tsaypa trukanqa yätsishqänöla ima aruylachöpis arukäriy.
12Tsayno arukuptikiqa manami imapis pishïshunkipaqtsu. Tsaymi Jesucristuman mana yärakuqkunapis respitashunkipaq.
Señor Jesucristo kutimunanpaq nishqan13Wawqi panikuna, wanurpis kawarimunantsipaq kashqanta musyanaykitami munä. Wakin runakunaqa wanur pamparashqalancho ushakänanpaq kashqanta yarparmi fiyupa lakikärin. Noqantsiqa paykunano ama lakikushuntsu.
14Musyantsimi wanushqanpita Jesucristuta Tayta Dios kawaritsimushqanta. Tsaynölami Jesucristuta chaskikuqkunatapis Tayta Dios kawarirkatsimur Jesucristuwan shuntanqapaq.
15Tsaymi Jesucristo yachatsishqanno noqapis qamkunata kayno nï: Mayqantsipis Jesucristo kutimushqan junaqyaq kawarqa manami wanushkunapita mas puntataqa aywashuntsu.
16Jana patsapita Jesucristo kutimuptinmi mandaq ángel qayakamushqan y Tayta Diospa cornëtanta tukamushqanpis mayakämunqa. Tsay hörami Jesucristuman yärakuykar wanuqkunaqa puntata kawarimunqa.
17Nirkurnami kawaykaqkunatapis shuntakamäshun. Pukutay jananchönami Señor Jesucristuwan lapantsi tinkushunpaq. Nirkurmi paywan imayyaqpis kawakushunpaq.Mat. 24.30-31; Mar. 13.26-27; 1Cor. 15.51-52.
18Tsayno kananpaq kaykaptinqa kay yachatsishqäkunata yarpätsinakur jukniki juknikipis shakyätsinakäriy.
Who We AreWhat We EelieveWhat We Do
2025 by iamachristian.org,Inc All rights reserved.
