1Kaychömi qelqaraykan Edom nación runakunapaq profëta Abdíasta Tayta Dios revelashqan.
Tayta Diosmi nacionkunaman juk kachata kachashqa.
Tsay kachami wilakur kayno niykan:
<<¡Aku aywashun edomita runakunata atacanantsipaq!>>
2Edomita runakunatami Tayta Dios kayno nin:
< Tsaynöpami pasaypa penqayman churashayki. 3Qamkunaqa qaqakunata uchkuykur wayikikunata rurarkurmi ali chölu tukurkaykanki. Altunnin qaqakunacho tarmi pipis mana vincishunaykipaq kashqanta yarparkaykanki. Tsayno karmi manakaqkunaman yärakurkaykanki. 4Ankano may altupa päriptikipis y qoylarkuna kaykashqancho punukunaykita ruraptikipis tsaypitami jitarpamushayki>>. Tayta Diosmi tsayno nin. 5< Üva palaqkuna ¿manaku juk ishkay sarta üvakunata yörancho kachaykun? Noqami itsanqa lapaykita ushakätsishaykipaq. 6Edomita runakuna, imaykaykikunatapis lapantami qechupäkushunkipaq. Pakaraykätsiptikipis ashi ashirkurmi ali alinnin kaqkunataqa apakärinqapaq. 7Lapan yanapashuqnikikunapis contrayki sharkumi lulapäshunkipaq. Vincirkushushpayki nacionnikipitapis qarqapäkushunkipaq. Amïguykikunapis contraykimi sharkunqapaq. Paykunaman yärakuykaptikipis lulapaylapami desgraciaman jitarpushunkipaq. Edomita runakuna, ¡maytaq musyaq y yachaq kashqayki!>> 8 Tayta Diosmi edomita runakunata mastapis kayno nin: < Tashqayki jirkakunacho manami juklaylapis yachaq runakuna quëdanqatsu. 9Mantsakushpanmi Temáncho taq ali chölu runakunapis siksikyanqaraq. Qamkuna tashqayki kaqchöqa lapanmi wanutsishqa kanqa. 10< Tsayno rurashqaykipitami kikikikunapis penqaypaq ushakashqa kankipaq. 11Karupita shamuq contran soldädukuna imaykatapis markapita apakäriptin y Jerusalénpa punkunkunata pakir ushaptin qamkunaqa tsay soldädukunata yanaparqaykimi. Qechushqankunata rakipänakunanpaq suertita jitaptin tsay runakunanömi qamkunapis imaykankunata apakärirqayki. 12¡Imanirtaq kushiparqayki ayluykikunata desgracia pasaptin! ¡Imanirtaq kushiparqayki Judá nación raqälana rikakuptin! ¡Imanirtaq asiparqayki kuyapaypaq kaykaqta rikapäkushpayki! 13¡Imanirtaq desgracia pasaykaptin akrashqä markaman yaykapäkurqayki! ¡Imanirtaq makilan choqpashqa waqarkaykaqta rikaykar kushiparqayki! ¡Imanirtaq contrankuna vinciptin imantapis apakärinaykipaq yaykapäkurqayki! 14¡Imanirtaq qeshpikuykaqkunata wanutsipäkunaykipaq tinkuq nänikunacho shuyarparqayki! ¡Imanirtaq ayqikuykaqkunata contrankunapa makinman churarqayki! 15< Tsay junaqmi runakunata nakatsishqaykino qamkunatapis nakatsishaykipaq. 16 Sagrädu jirkannïcho kuyashqä runakunata nakatsipäkushqaykinömi qamkunatapis y lapan nación runakunatapis nakatsishaykipaq. Castigaptïmi chipyaq ushakanqapaq. 17Kawaykar quëdaq runakunami itsanqa Sión jirkanman amparakärinqapaq. Tsay jirkan sagrädu kaptinmi Jacobpita miraq runakuna salvakushpan herencianta shuntapäkunqapaq. 18Tsay witsanmi Jacobpita y Josépita miraq runakuna ninano kanqa. Esaúpita miraq runakunanami tsakishqa oqshano kanqa. Edomita runakunata chipyaq ushakätsiptinmi juklaylapis kawaykar mana quëdanqanatsu. Noqa Tayta Diosmi tsayno nï>>. 19Tsaypitanami Neguevcho taq Israel runakuna Edom partita acaparanqa. Sefelacho taq Israel runakunami filisteo runakuna tashqan partita acaparanqa. Wakin Israel runakunanami Efraín partita y Samaria partita shuntapäkunqa. Benjamín trïbu kaq Israel runakunami Galaad partita shuntapäkunqa. 20Juk lädu nacionpita tsaytsika Israel runakuna kutimurmi cananeo runakuna unay tashqan partita shuntapäkunqa Sarepta markayaq. Jerusalénpita Sefarad markaman prësu apapäkushqan runakunanami kutimur Neguevcho kaykaq markakunata shuntapäkunqa. 21Lapanta vincirkurnami Sión jirkanman witsanqa Esaúpita miraq runakunata juzgapäkunanpaq. Tayta Diospa makinchömi lapanpis kanqapaq.
Who We AreWhat We EelieveWhat We Do
2025 by iamachristian.org,Inc All rights reserved.
