Romanos 12 - Quechua Margos-Yarowilca-Lauricocha Bible（qvm）

Tayta Diosta sirvinantsipaq churamashqantsi

1Wawqi panikuna, qamkunatami ruwakü Tayta Diospa makinman kawaynikita kachaykunaykipaq. Pay kuyapaykäshuptikiqa kawaykaq santu sacrificiu kaykulay. Tsayno karmi Tayta Dios munashqanno rasunpa sirvipäkunki.

2Wakin runakuna jutsata ruraptinpis qamkunaqa jutsata ama rurapäkuytsu. Yarpaynikikunapis nawpata kashqannöqa ama katsuntsu, sinöqa Tayta Dios munashqannöna katsun. Tsayno kawarmi tantiyapäkunki pay munashqanno kawayqa kushikuypaq kashqanta.

3Kuyapämarmi Tayta Dios wilakuqnin kanäpaq churamashqa. Tsaymi lapaykita kayno nï: Ama yarpapäkuytsu wakin runakunapita mas väliq kashqaykita. Payman yärakunantsipaq Tayta Dios yanapaykämaptintsiqa tantiyakushun lapantsi välishqantsita.

4Cuerpuntsicho atska partintsikuna karpis juk cuerpulami kaykan. Tsayno karpis manami tsay ruraylatatsu ruran.

5Tsaynölami Jesucristuta chaskikuqkuna atskaq karpis juknintsi juknintsipis juk cuerpunöla kaykantsi.

6Tsayno kaptintsimi Tayta Dios juknintsi juknintsita churamantsi pay munashqanno sirvinantsipaq. Profëta kanantsipaq churamaptintsiqa payman yärakur wilakuyninta wilakushun.

7Yanapanantsipaq churamaptintsiqa yanapashun. Yachatsinantsipaq churamaptintsiqa yachatsishun.

8Shakyätsinantsipaq churamaptintsiqa shakyätsishun. Imatapis qaranantsipaq churamaptintsiqa lapan shonquntsiwan qarashun. Mandanantsipaq churamaptintsiqa shumaq yarpachakuykur mandashun. Kuyapäkuq kanantsipaq churamaptintsiqa kushishqala pitapis yanapashun.Imano kawanantsipaqpis yätsishqan

9Janan shonqula kuyanakunaykipa trukanqa lapan shonquykiwan kuyanakäriy.

Lutankunata ruranaykipaqqa ama yarpaylapis yarpaytsu. Tsaypa trukanqa alilata rurar kawapäkuy.

10Ayluykiwan kuyanakushqaykino kuyanakäriy. Tsaynöpis jukniki jukniki respitanakäriy. Kikilaykikuna ali kawanaykipaq yarpachakärinaykipa trukanqa wakinkunapis ali kawananpaq yarpachakäriy.

11Ama qela kapäkuytsu, sinöqa kushi kushila Tayta Diosta sirvipäkuy.

12Tayta Diosta shuyäkur kushi kushila kawakäriy.

Imano nakarpis payman yärakäriy.

Imaypis payta manakäriy.

13Jesucristuman yärakuq mayiki nisidächo kaptinqa yanapay. Wayikiman chayamuptinpis patsatsiy.

14Chikishuqnikipa wasanta ama rimapäkuytsu. Tsaypa trukanqa Tayta Diosta manakäriy yanapananpaq.

15Kushishqa kaqkunawan kushikäriy. Waqaqkunawan waqapäkuy.

16Jukniki juknikipis ali kawapäkuy. Runa tukunaykipa trukanqa humildi kaqkunawanpis kuyanakur kawapäkuy. Ama yachaq tukäriytsu.

17Chikipäkushuptikipis ama chikipäkuytsu. Tsaypa trukanqa pïmaypis rikakunanpaq alilata rurar kawapäkuy.

18Imaykanöpapis lapan runakunawan ali kawapäkuy.

19Kuyay wawqi panikuna, runakuna chikishuptikipis ama vengakäriytsu. Tsaypa trukanqa Tayta Dios juzgananpaq paypa makinman kachaykuy. Tayta Diospa palabranchöpis kaynömi qelqaraykan: <>.

20Mastapis kaynömi niykan:

<

Yakunaptinqa yakuta makyaykuy.

Tsayno ruraptikimi pasaypa penqakunqapaq>>.

21Runakuna lutanta ruraptinpis qamkunaqa alilata rurapäkuy.