Salmo 140 - Quechua Margos-Yarowilca-Lauricocha Bible（qvm）

Salmo 140 (139)Fiyu runakunapita tsapänanpaq Tayta Diosta manakushqan 1 (1) Cantaqkunapa mandaqninpaqmi. David qelqashqan salmu.

1 1 (2) Tayta Dios, fiyu runakunapita tsapaykalämay.

Wanutsikuq runakunapita qeshpiykatsilämay.

2 2 (3) Paykunaqa lutanta ruranalanpaqmi imaypis yarpachakurkaykan.

Waran waranmi pitapis achäquita ashiparkaykan.

3 3 (4) Paykunapa shiminqa culebrapa lanzëtannömi kaykan.

Rimashqanpis culebrapa venënunnömi kaykan.

4 4 (5) Tayta Dios, fiyu runakunapita tsapaykalämay.

Wanutsikuq runakunapita qeshpiykatsilämay.

Paykunaqa wilanakurkaykan jutsata ruratsimänanpaqmi.

5 5 (6) Ali chölu tukurmi trampata churapämashqa.

Imaykanöpapis desgracia pasamänantami munarkaykan.

Maypa aywaptïpis trampatami churapaykäman. Selah

6 6 (7) Tayta Diostami kayno nir manakü:

<

Manakamushqäta mayaykalämay>>.

7 7 (8) Munayniyuq Tayta Dios, salvamaqnïmi kaykanki.

Conträ sharkuptin qammi tsapämanki.

8 8 (9) Tayta Dios, fiyu runakuna imatapis rurananta ama kachapaykulaytsu.

Yarpashqankunapis ama kamakaykulätsuntsu.

Kamakaptinqa runa tukunqapaqmi. Selah

9 9 (10) Chikimaqnïkuna maldicionamashqanqa kikinkunaman kutitsun.

10 10 (11) Paykunaman shanshakuna shikwamutsun.

Ninaman qaykushqa katsun.

Imaypis mana yarqamunanpaq marpuman jeqatsun.

11 11 (12) Wasarima runakunaqa kay patsacho ama miratsuntsu.

Peleandëru runakunataqa ima desgraciapis pasatsun.

12 12 (13) Tayta Dios, noqa musyämi waktsata ali arreglashqaykita.

Waktsakunapa favorninmi sharkunki.

13 13 (14) Ali ruraq runakunaqa jutikita joqarirmi alabashunkipaq.

Munashqaykino kawaq runakunaqa nawpaykichömi kawapäkunqapaq.