2 Samuel 23 - Quechua Margos-Yarowilca-Lauricocha Bible（qvm）

Davidpa ultimu kaq salmun

1Davidpa ultimu kaq salmun kaynömi kaykan:

Isaípa tsurin Davidmi kay alabanzata qelqarqan.

Paytami Tayta Dios yanaparqan pïmaypis respitananpaq.

Paytami Jacob yärakushqan Tayta Dios akrarqan rey kananpaq.

Paymi Israel runakunapa shonqunman chayaqpaq cantan.

2< Espïritunmi imata parlanäpaqpis tantiyatsiman.

Paypa palabranqa shimilächömi kaykan.

3Israel runakunapa Diosninmi parlapämashqa.

Tsapämaqnï Diosnintsimi kayno nimashqa:

y noqata mantsakamar mandaq runaqa

4patsa waraptin atsikyaqnömi kanqa,

inti chipchipyar jeqamuqnömi kanqa

y qewa winamunanpaq tamyamuqnömi kanqa>.

5Tsaymi noqapita miraqkunata Tayta Dios imaypis yanapanqa.

Tsayno yanapananpaqmi noqawan pactuta rurashqa.

Pactu rurashqantaqa manami trukatsinqatsu.

Nishqankunata cumplirmi Tayta Dios imaypis salvaman.

Pay yanapamaptinmi lapan yarpashqäkunapis ali kamakanqa.

6Mana ali ruraqkunaqa kashano jitarishqa kanalanpaqmi karkaykan.

Yataptintsi tuksimaptintsimi

7kashakunataqa fiërruwanraq o lanzawanraq wititsintsi.

Kashakunata nina rupar ushashqannömi paykunapis ushakanqa>>.

Davidpa ali chölunnin kaq kimsa soldädunkuna 1 Crónicas 11.10-19

8Davidpa mas ali chölunnin kaq soldädunkuna kimsami karqan. Punta kaqmi karqan Hacmonipa tsurin Joseb-basebet. Paymi karqan tsay kimsa soldädukunapa capitannin. Juk kutichömi Joseb-basebetqa lanzanwan wanutsirqan pusaq pachak (800) soldädukunata.

9Tsaypitanami karqan Dodupa tsurin Eleazar. Payqa karqan Ahohí markapitami. Eleazarpis karqan alinnin kaq soldädumi. Israel runakunawan guërrata rurananpaq filisteo runakuna Pasdamimcho juntakaptin Eleazarpis tsaycho Davidwan kaykarqan. Lapan Israel soldädukuna qeshpir aywakuptinpis

10Eleazarmi itsanqa mana mantsakuypa makinpis espädaman aptakashqa quëdashqanyaq filisteo soldädukunawan pelyarqan. Vincishqanta tantiyakurmi Israel soldädukuna Eleazar kaqman kutiykur wanushqa soldädukunapa imaykantapis apakärirqan. Tayta Dios tsayno yanapaptinmi filisteo soldädukunata pasaypa vincipäkurqan.

11Tsaynölami Davidpa alinnin kaq soldädun karqan Agipa tsurin Sama. Payqa Arar markapitami karqan. Juk kutimi filisteo runakuna Lehicho juntakaykur Israel runakunata atacarqan pushpu chakra chawpincho. Israel soldädukuna qeshpir aywakuptinpis

12Samami itsanqa tsay chakra chawpincho filisteo soldädukunata vincirqan. Tsaynöpami Israel runakunata Tayta Dios yanaparqan filisteo runakunata vincipäkunanpaq.

13Tsaynölami Davidpa wakin alinnin kaq soldädunkunapis karqan. Tsay soldädukunatami reqipäkurqan Kimsa Chunka jutiwan. Davidpa kimsa ali chölunnin kaq soldädunkunapis Kimsa Chunka kaqchömi karqan.

Juk kutichömi cosëcha witsan Adulam machaycho David pakaraykarqan. Filisteo runakunanami campamentunta ruraykur Refaim pampacho karkaykarqan. Adulam machaymanmi Davidpa kimsa mas ali chölunnin kaq soldädunkuna aywarqan paywan tinkunanpaq.

14Beléncho juk punta filisteo soldädukuna kaptinmi tsay machayman David pakakurqan.

15Kimsa ali chölunnin kaq soldädunkuna chayaykuptinmi David kayno nirqan: <>

16Tsayno niptinmi filisteo soldädukuna Beléncho kaykaptinpis tsay ali chölunnin kaq kimsa soldädukuna pakaylapa yaykuykur pukyupita yakuta apaparqan David upunanpaq. Yakuta apapaptinpis David manami upurqantsu. Tsaypa trukanqa Tayta Diospaq pampaman jichashpanmi kayno nirqan:

17<<¡Tayta Dios! Kay yakuta upurqa wanuytapis mana mantsaypa apamuq runakunapa yawarninta upuqnöchari kashaq>>.

Tsayno nirmi David mana upurqantsu. Tsay yakuta apaparqan kimsa ali chölunnin kaq soldädukunami.

Kimsa Chunka nishqan alinnin kaq soldädukuna 1 Crónicas 11.20-41

18Kimsa Chunka nishqan alinnin kaq soldädukunapa capitanninmi karqan Sarviapa wawan Joabpa wawqin Abisai. Juk kutichömi kimsa pachak (300) contran soldädukunawan pelyashpan lanzanwan lapanta Abisai wanutsirqan. Tsaynöpami kimsa ali chölunnin kaq soldädukuna respitashqa kashqanno Abisaipis respitashqa karqan.

19Abisaiqa Kimsa Chunka nishqan soldädukunapita mas reqishqa karmi paykunapa capitannin karqan. Tsayno karpis manami tinkurqantsu kimsa ali chölunnin kaq soldädukunamanqa.

20Benaíapis alinnin soldädumi karqan. Payqa Cabseel markapita Joiadapa tsurinmi karqan. Alinnin soldädu karmi Moab nacionpita pelyayta ali yachaq ishkay soldädukunata wanutsirqan. Tsaynöpis juk junaq rajuykaptinmi jatunkaray pözuman yaykurir leonta wanutsirqan.

21Tsaynöpis Egiptupita jatun runa lanzan aptashqa atacananpaq kaykaptinmi Benaíaqa qeruwan wiruykälar lanzanta qechurqan. Nirkurmi tsay lanzalanwan kikinta wanutsirqan.

22Joiadapa tsurin Benaía tsayno rurashqanpitami kimsa ali chölunnin kaq soldädukuna respitashqa kashqanno paypis respitashqa karqan.

23Kimsa Chunka nishqan soldädukunacho respitädu karpis Benaíaqa manami tinkurqantsu kimsa ali chölunnin kaq soldädukunamanqa. Paytami David churarqan cuidaqnin soldädunkunapa capitannin kananpaq.

24Kimsa Chunka nishqan alinnin kaq soldädukunapa jutinkunami kaycho qelqaraykan:

Joabpa wawqin Asael;

Belén markapita kaq Dodupa tsurin Elhanán;

25Harod markapita kaq Sama;

Elica (paypis Harod markapitami karqan);

26Palti markapita kaq Heles;

Tecoa markapita kaq Iquespa tsurin Ira;

27Anatot markapita kaq Abiezer;

Husa markapita kaq Sibecai;

28Ahohí markapita kaq Salmón;

Netofa markapita kaq Maharai;

29Baanapa tsurin Heleb (paypis Netofa markapitami karqan);

Gabaa markapita kaq Ribaipa tsurin Itai (Gabaaqa Benjamín trïbu runakuna tashqanchömi kaykan);

30Piratón markapita kaq Benaía;

Gaas raqrapita kaq Hidai;

31Arba markapita kaq Abi-albón;

Bahurim markapita kaq Azmavet;

32Saalbón markapita kaq Eliaba;

Jasénpa tsurin Jonatán;

33Arar markapita kaq Sama;

Sararpa tsurin Ahíam (paypis Arar markapitami karqan);

34Maaca markapita kaq Ahasbaipa tsurin Elifelet;

Gilo markapita kaq Ahitofelpa tsurin Eliam;

35Carmel markapita kaq Hezrai;

Arab markapita kaq Paarai;

36Soba markapita kaq Natánpa tsurin Igal;

Gat markapita kaq Bani;

37amonita runa Selec;

Beerot markapita kaq Naharai (paymi Sarviapa wawan Joabpa armankunata puritsir yanaparqan);

38Itri markapita kaq Ira;

Gareb (paypis Itri markapitami karqan);

39heteo runa Urías.

Lapan tsay runakunaqa kimsa chunka qanchismi (37) karqan.