1 Tayta Dios, ¿imanirtaq karucho kaykanki?
¿Imanirtaq lakikuykaptï pakakunki?
2Jutsa ruraq runakunaqa orgullösu kashpanmi waktsakunata makitsakun.
Paykunaqa jukpaq trampata churashqanmanmi kikinkuna jeqanqa.
3Fiyu runakunaqa lutanta yarpashqanpitami alabakärin.
Codiciösu runakunawan kuyanakurmi Tayta Diosta manakaqman churapäkun.
4Ali chölu kashqanta yarparmi Diosta mana ashipäkuntsu.
Dios kashqantaqa manami yarpaylapis yarpapäkuntsu.
5Lapan rurashqankunapis yarpashqannömi kamakan.
Tayta Dios juzgananpaq kashqantaqa manami tantiyapäkuntsu.
Contrankunataqa pasaypa manakaqmanmi churapäkun.
6Desgracia imaypis mana pasananpaq kashqantami yarpapäkun.
Imaypis kushishqala kawananpaq kashqantami criyipäkun.
7Runa mayinta lutalami maldicionan, lulapan y ashlipäkun.
Ali shimilanpa rimarpis lulaparkaykanmi.
8Jäkuqninman pakakuykurmi runa mayinta asaltan.
Nänipa aywaykaqtapis shuyaykurmi traicionpita wanutsipäkun.
Pïninpis mana kaqkunataqa atacananpaqmi rikapan.
9Machaycho pakakuykur león shuyaraqnömi waktsakunata shuyarpaykan.
Redwan tsariqnömi mana ali yarpayninkunawan lulaparkaykan.
10Lätakuykur imatapis león tsariqnömi atska runakunata tsaripäkun.
11Tsayno rurapäkun Dios mana juzgananpaq kashqanta yarparmi.
Dios mana rikashqantami yarpapäkun.
12 Tayta Dios, mana ali runakunataqa jukla juzgaykulay.
Nakatsishqan runakunataqa ama qonqaykulaytsu.
13¿Imanirtaq fiyu runakuna manakaqman churashunki?
¿Imanirtaq yarpapäkun mana juzganaykipaq kashqanta?
14Qamqa rikaykankimi mana alikunata rurashqanta.
Paykunata imanöpis rurashqanman tupumi castigankipaq.
Pïninpis mana kaqkunaqa qammanmi yärakamun.
Waktsakunataqa qammi yanapanki.
15Jutsa ruraq runakunapataqa rikrantapis pakiykulay.
Lapan jutsa rurashqanpita juzgaykulay.
Tsay niraq runakunataqa lapanta ushakaykatsilay.
16 Tayta Dioslami imaypis rey kaykan.
Payta mana cäsukuq runakunaqa ushakanqami.
17 Tayta Dios, cäsukushuqniki runakuna manakamushuptiki imaypis mayankimi.
Paykunataqa shakyätsinkimi y kuyapankimi.
18Waktsakunata y nakaycho kawaq runakunata yanapankimi.
Alpapita kamashqayki runaqa runa mayinta ama nakatsitsunnatsu.
Who We AreWhat We EelieveWhat We Do
2025 by iamachristian.org,Inc All rights reserved.
