1 1 (1b) Fiyu runakunapita ama rabyakuytsu.
Paykunata ama nanaparaytsu.
2Paykunaqa lulu qewata lukiptintsi qawshukar ushakashqannömi ushakanqa.
3 Tayta Diosman yärakur alikunata ruray.
Kay patsacho kawashqaykiyaq pay munashqanno kaway.
4 Tayta Diosta kushishqa sirviy.
Tsayno kawaptikimi shonquyki munashqanta kamaripäshunkipaq.
5Lapan yarpachakushqaykita Tayta Diospa makinman kachaykuy.
Payman yärakuptikiqa yanapashunkimi.
6Tsaynöpami lapanpis tantiyakunqa ali runa kashqaykita.
Tsayqa kanqa inti jeqamuptin lapanpis rikakashqannömi.
7 Tayta Diosman yärakur ama lakikuytsu.
Yanapashunaykipaq mana ajayaypa shuyaray.
Runa rïcuyaptin ama nanaparaytsu.
Mana alita rurananpaq yarpachakuptinpis ama cäsupaytsu.
8Lutalaqa imapitapis ama rabyakuytsu ni piñakuytsu.
Rabyarqa lutantami ruranki.
9Fiyu runakunataqa Tayta Diosmi ushakätsinqapaq.
Payman yärakuqkunami itsanqa qoshqan nacioncho ali kawapäkunqapaq.
10Manapis aykaqlatanami fiyu runakunaqa ushakanqapaq.
Mayjina ashirpis manami tarinkipaqtsu.
11Ali shonqukunami itsanqa Tayta Dios qoshqan nacioncho ali kawanqapaq.
Paykunaqa kushishqami kawapäkunqa.
12Fiyu runaqa ali runakunata wanuyparaqmi chikin.
Imata ruraptinpis nanaq nawinpami rikapaykan.
13Tsayno kawaptinmi Tayta Dios asikun.
Pay musyanmi höran chayamuptin ushakätsinanpaq kashqanta.
14Fiyu runakunaqa espädanta y flëchantami kamarikärin.
Waktsakunata, humildikunata y ali runakunata wanutsinanpaqmi kamarikushqa karkaykan.
15Jina kaqtami kikinpa espädanwan shonqunpa tuksinqa.
Flëchankunatapis chipyaqmi pakir ushanqa.
16Rïcu karpis fiyu runa kanantsipa trukanqa waktsala karpis ali runa kashqantsimi mas ali kaykan.
17Fiyu runakunataqa chipyaqmi Tayta Dios ushakätsinqa.
Ali runakunatami itsanqa yanapanqa.
18 Tayta Dios munashqanno kawaq runakunataqa mana kachaypami cuidan.
Paykuna chaskinanpaq kaq herencianqa imaypis manami ushakanqatsu.
19Nakay shamuptinpis alimi kawapäkunqa.
Muchuy kaptinpis mikuynin putsuy putsuymi kanqa.
20Fiyu runakunaqa tsaki qewa rupar ushakashqannömi ushakanqa.
Tayta Diospa contran runakunaqa qoshtaynömi elqanqa.
21Fiyu runakunaqa imata manakurpis manami kutitsintsu.
Ali runakunami itsanqa kuyapäkuq kar pïmaytapis yanapan.
22 Tayta Diospa bendicionninta chaskiq runakunaqa chaskishqan nacioncho alimi kawapäkunqa.
Maldicionashqan kaq runakunami itsanqa ushakanqa.
23Runa imano kawananpaqpis Tayta Diosmi kamakätsin.
Pay munashqanno kawananpaqmi tantiyatsin.
24Makinwan janchararmi ishkiyta munaptinpis joqarkun.
25Wamra kashqäpita awkinyashqäyaq manami imaypis rikashqätsu ali runa muchuqta.
Tsaynöpis manami rikashqätsu wamrankunatapis manapakur puriykaqta.
26Ali runaqa kuyapäkuq karmi muchuycho kaqkunata yanapan.
Wamrankunapis yanapakuqmi karkaykan.
27Mana alikunata ruranaykipa trukanqa alilata ruray.
Tsayno kawarqa imaypis jawkalami kawankipaq.
28Alita ruraptikiqa Tayta Dios kushikunmi.
Pay munashqanno kawaqkunataqa imaypis manami kachantsu.
Fiyu runakunatami itsanqa miraqninkunatapis ushakätsin.
29Ali runakunaqa Tayta Dios qoshqan nacionchömi imayyaqpis tanqa.
30Ali runaqa shumaq tantiyakuykur ali kaqlatami parlan.
Rasun kaqlatami imatapis riman.
31Tayta Diospa leyninkunatami shonquncho yarparan.
Tsaymi imaypis lutanta mana rurantsu.
32Fiyu runaqa ali runata wanutsinan kashqami maypa aywaptinpis watqaraykan.
33Tsayno kaptinpis wanutsinanta Tayta Dios manami kachapantsu.
Ni jutsata jitapänanpaqpis manami kachapantsu.
34 Tayta Diosman yärakuy.
Pay munashqanno imaypis kaway.
Tsayno kawaptikiqa paymi yanapashunki qoshushqayki nacioncho kushishqa kawanaykipaq.
Rikaykaptikimi fiyu runakunata ushakätsinqapaq.
35Noqa rikarqämi fiyu runakuna runa mayinta maytsaychöpis munashqanta ruraykätsiqta.
36Tsayno kaykashqanchömi ushakashqa.
Paykunaqa lapanmi elqashqa.
37Tayta Dios munashqanno kawaq runata rikar tantiyakuy.
Ali kawaq runaqa kushishqami kawanqa.
38Mana wiyakuq runakunami itsanqa chipyaq ushakanqa.
Paykunaqa ushakänanpaqnami karkaykan.
39Ali runakunataqa Tayta Diosmi yanapan.
Paykunataqa ima nakaykunapitapis tsapanmi.
40Fiyu runakunapa makinpita qeshpinanpaqmi yanapan.
Tsayno yanapan Tayta Diosman yärakuptinmi.
Who We AreWhat We EelieveWhat We Do
2025 by iamachristian.org,Inc All rights reserved.
