2 Crónicas 17 - Quechua Margos-Yarowilca-Lauricocha Bible（qvm）

Judá nacioncho Josafat rey kashqan

1Asa wanuykuptinmi tsurin Josafatna rey karqan. Payqa Israel nacionta ichipänanpaqmi kamarikurqan.

2Tsaymi Judácho kaykaq ali murallashqa markakunaman y wakin markakunamanpis soldädukunata churarqan. Tsaynölami soldädukunata churarqan papänin Asa acaparashqan Efraíncho kaykaq markankunamanpis.

3Unay aylun David cäsukushqanno cäsukuptinmi Josafatta Tayta Dios yanaparqan. Josafatqa Baal dioskunatapis manami adorarqantsu.

4Israel nación runakuna jutsata ruraptinpis payqa manami jutsata rurarqantsu. Tsaypa trukanqa papänin yärakushqan Tayta Diospa mandamientunkunata cäsukurmi kawarqan.

5Tsaymi Tayta Dios yanaparqan Judá nación runakuna lapanpis paypa makincho kananpaq. Tsaynölami Judá runakunaqa imaykatapis mandaqnin rey Josafatpaq apapäkuq. Tsaynöpami Josafat rïcuyarqan y pïmaypitapis respitashqa karqan.

6Lapan voluntäninwan Tayta Dios munashqanno kawashpanmi markakunacho kaykaq altarkunata y Asera diösapaq jawishqan raku qerukunatapis Judá nacioncho lapanta ushakätsirqan.

7Kimsa watana rey kaykarmi Judácho kaykaq markakunaman mandäshiqninkunata Josafat kacharqan Tayta Diospa mandamientunkunata yachatsinanpaq. Tsay mandäshiqkuna karqan Ben-hail, Abdías, Zacarías, Natanael y Micaías.

8Paykunawan aywananpaqmi Josafat kacharqan levitakunata. Tsay runakuna karqan Semaías, Netanías, Zebadías, Asael, Semiramot, Jonatán, Adonías, Tobías y Tobadonías. Paykunawanmi aywarqan cüra Elisama y cüra Joram.

9Paykunami markan markan purir Judá nacioncho taq runakunata Tayta Diospa leyninkuna qelqaraykaq librupita yachatsirqan.

10Judá nacionpa nawpancho kaykaq nacionkunapis Tayta Diosta mantsakurmi Josafat mandashqan markakunata mana atacarqantsu.

11Tsaypa trukanqa wakin filisteo runakunapis regäluta y qellayta apamurmi Josafatta qoykurqan. Arabia nación runakunapis rey Josafatta apapämurqan qanchis waranqa qanchis pachak (7,700) uyshakunata y qanchis waranqa qanchis pachak (7,700) chïvukunata.

12Tsayno mas munayniyuq rikakurmi Judá nacioncho Josafat sharkatsirqan pakakuna törrikunata y mikuy churakuna markakunata.

13Tsaynöpami Judá nacioncho kaq markakunata mejoratsirqan.

Jerusalénmanpis ali chölu soldädunkunatami Josafat churarqan.

14Tsay soldädunkunata aylunpa aylunpa apuntatsiptinmi Judá trïbupita karqan kimsa pachak waranqa (300,000) soldädukuna. Cada batalloncho karqan waranqa (1,000) soldädukuna. Lapan batallonpa capitanninkunapa mandaqnin karqan Adnas.

15Juk capitán Johanánpa munayninchömi karqan ishkay pachak pusaq chunka waranqa (280,000) soldädukuna.

16Zicripa tsurin capitán Amasíaspa munayninchömi karqan ishkay pachak waranqa (200,000) ali chölu soldädukuna. Payqa kikinpa voluntäninpitami yaykurqan Tayta Diosta sirvir capitán kananpaq.

17Benjamín trïbupitami karqan ishkay pachak waranqa (200,000) soldädukuna. Cada ünunpami karqan escüdunkuna y flëchankunapis. Paykunapa capitanninmi karqan Eliada. Payqa pelyayta yachaq ali chölumi karqan.

18Juk capitannami karqan Jozabad. Paypa munayninchömi karqan pelyananpaq kamarikushqa pachak pusaq chunka waranqa (180,000) soldädukuna.

19Lapanpis tsay soldädukunaqa Jerusaléncho karqan rey Josafat nishqanta rurananpaqmi. Tsayqa karqan Judá nacioncho corralashqa markakunacho kaykaq soldädukunata mana yupaylapami.